“Mibodo Tany” Any Afrika Ve Ny Orinasa Indiana ?

Koa satria ireo orinasa sy governemanta vahiny mividy na manofa tany any amin'ireo firenena manerana an'i Afrika, mbola mitohy ny adihevitra hoe izy ireny ve handrisika ny fampandrosoana na dia fibodoana tany  fotsiny amin’ izao, izay mamindra toerana ireo mponina teo an-toerana no sady loza mananontanona ny fahavitan-tena ara-tsakafo?

Vao avy nanoratra ny fidiran'ny orinasa Indiana any Etiopia sy any Mali i Aman Sethi (@Amannama) solontenan'ny The Hindu any Addis Ababa ary nandray anjara tamin'ny  resadresaka Q&A (Fanontaniana&Valiny) tao amin'ny Facebook izy tamin'ny 19 May momba ny olana atao hoe : ny fibodoan'ny Indiana tany any amin'ireo firenena ao Afrika.

Izao no fanontanian'i Susanna Myrtle Lazarus :

Inona no tena tanjon'ny fibodoana tany any Afrika ? Noho ny sandany ara-barotra ve sa fotsiny noho ireo otrikarena toy ny rano sns ?

Nomarihin'i Aman Sethi fa nampiady hevitra ilay fitenenana hoe ” fibodoana tany “:

Tsara, fanontaniana mahaliana izany : mbola eo am-pandinihina manontolo ny resaka “fibodoana tany” ny mpitsara. Namoaka didy momba ny fampiasam-bola amin'ny tany ohatra ny Firenena Mikambana. Aleon'ilay firenena ivahinianana mampanofa toy izay hivarotra ny tany, raha ny mahazatra izany dia tsy mikasika ny sandany ara-barotra satria tsy afaka mivarotra ilay tany ireo orinasa mpanofa. Tsy miova mihitsy ny fampiasam-bola fa na harena an-kibon'ny tany, na ny hazo, na ny tany sy ny rano hambolena. Ny fanontaniana lehibe mipetraka dia ny hoe : moa ve mba misy zavatra miverina voarain'ireo firenena mpampiantrano amin'ny fampanofàna tany sy (matetika) famindràna ny vahoaka ?

Sai Ramakrishna Karuturi, Managing Director of Karuturi Global Ltd., Gambella, Ethiopia. Photo by Flickr user Planète à vendre (CC BY-NC-ND 2.0).

Sai Ramakrishna Karuturi, Tale mpanatanteraky ny Karuturi Global Ltd., Gambella, Etiopia. Sary avy amin'ny Planète à vendre, mpampiasa Flickr  (CC BY-NC-ND 2.0).

Nametra-panontaniana i Jayakarthik Sabarathnam hoe:

Tsy nosaininareo va fa ny olan'ny tany any Afrika dia vokatry ny fifanjevoana amin'ny hoe iza no tompon'ny tany, na an'olon-tsotra izany na fanjakana, nanomboka tamin'ny nipetrahan'ny olona teny amin'ny tanim-panjakana amin'ny fiheverana fa izy ireo no tompon'ny tany nefa ny fanjakana mihevitra izany fa azy?

Izao no navalin'i Sethi :

Heveriko fa io no teboka fototra sy saropady – farafaha-keliny ao amin'ny firenena roa izay hotantaraiko- Etiopia sy Mali- izay misy fifanjevoana mikasika ny taratasy fananan-tany (titre). Any Etiopia ohatra, dia an'ny fanjakana ny tany rehetra ary ampanofaina amin'olon-tsotra na orinasa tsy miankina. Any amin'ny toerana toa an'i  Gambella – izay ambarako amin'ny tapany faharoa amin'ny tantara  – matetika ireo vondrom-piaraha-monina no efa manana fitakiana iombonana efa vita momba ny tany izay tsy voarakitra ho toy ny an'ny fanjakana. Tena miteraka olana saro-bahàna izany. Inoan'ny governemanta Etiopiana fa ny Fandaharan'asa momba ny Fampandrosoana Kaominaly -na famoaronana tanàna- no hahatsotra ny fampiasana ny tany amin'ny fanomezana taratasy fananan-tany  ho an'ireo olona izay apetraka amin'ny alàlan'izay rafitra izay. Mazava loatra fa hitarika fiovàna ifotony amin'ny fomba fahatakaran'ny vondrom-piaraha-monina ny hoe tany izany.

Tian'i Roybath Mylaks ho fantatra raha manampy marina amin'ny fampitomboana ny fahaiza-manao ao an-toerana ny fampiasam-bola Indiana :

Manampy marina amin'ny  fanamafisana ny fahaiza-manao ho an'ny mponina any an-toerana ve ireo orinasa Indiana ireo ? Mampiasa olona avy eto an-toerana ve izy ireo sa manafatra olona avy any India ?

Izao ny valintenin'i Aman Sethi :

Mikasika ny herim-pamokarana – mazava tsara ny tenin'ny governemanta Etiopiana fa tiany raha toa ka olona avy eto an-toerana no hofanin'ireo orinasa.  Nosoratako tao amin'ny lahatsoratra iray, tamin'ny taona lasa, ny fomba nanehoan'ny zava-pisotro misy alikaola “Baron Ponty Chadha” ny drafitra hametrahany ireo mpamboly avy any Pendjab any Etiopia- nefa nolavin'ny governemanta izany. Manome alàlana ireo orinasa hampiditra teknisiana sy mpitantana ambony sy mahay ny ankamaroan'ny fanjakana, saingy andramo ny mitarika ireo orinasa hanofana ny mponina ho tonga mpampiasa milina sns…

Mikasika ireo andalana ireo ny fanontanian'i Samiksha Srivastava :

Tsy noheverinareo ve fa mampisonga ny fampandrosoana eto ny fisian'ireo ireo orinasa Indiana ireo ?

i Sethi tsy nieritreritra ny hisian'ny valinteny tsotra ho an'izany, sady nalainy ho ohatra ilay orinasa indiana Karuturi Global nitraka resabe izay voakiana mafy tamin'ny zavatra nataony tany Etiopia : 

Tsara, mino aho fa eo am-pieritreretana ny tena dika marin'ny fandrosoana ho azy ireo ireo firenena maro andalam-pandrosoana – aiza no làlan-kizorany, inona no otrikarena ampiasaina, inona no andraikitry ny fanjakana sy ny tsena ? ary koa, mihevitra aho fa tafiditra amin'ny ampahany amin'ny adihevitra ireo orinasa Indiana noho ny fandraisany anjara amin'ireny toekarena andalam-pivoarana ireny. Be no tsy faly amin'ny fahazahoan'ny orinasa vahiny iray velaran-tany midadasika any Etiopia, nefa misy ihany koa ireo mino fa hanampy ny firenena amin'ny varotra ivelany ireo orinasa toy ny Karuturi ireo – noho izany malalaka ny adihevitra amin'izao fotoana izao.

Nanontany i Pranay Sinha :

Heverinareo ve fa ilain'ny fanjakana ny fametrahana farafahakeliny fepetra ho an'ireo orinasa miasa ivelan'ny fireneny mba tsy ho ratsy fitondra ireo olona eo an-toerana mandritra ireny fampiasam-bolany ireny, sa fitsipi-pitondràn-tena ataon'ny orinasa ho fifehezantenany ihany ?

Novalian'i Aman Sethi tamin'ny nangalany ohatra indray ny Karuturi Global :

Raha ny fiheverako azy dia manana lalàna fototra hiarovana ny zon'ireo vondrom-piarahamonina iantraikàn'ireo tetikasa ireo ny ankamaroan'ny fanjakana- nefa maro ( tahaka ireo betsaka any India) no tsy mahara-maso tsara ireny orinasa ireny. Raha ny momba ny Karuturi ohatra, tsy misy lalàna voahitsakitsaka- fa tahaka ny hoe olana ara-drafitra tamin'ny namolavolàna ilay tetikasa no misy – noho izany dia mihevitra aho fa ilaintsika ny misaina mihoatra lavitra ny any ambadiky ny fitondrana ara-dalàna ary angamba hatomboka amin'ny fanandramana hanakatra bebe kokoa ireny dingana ireny araka izay mba tratrantsika. Mora ny miteny hoe ” fibodoana tany ara-panjanahantany amin'ny endriny vaovao”,  dia farànana ny resaka – nefa tsy manampy ny fahafantarantska an'izao tontolo izao izany- mametraka teritery amin'ny fandraisan'andraikitra izany satria tena vita tokoa ny fifanakalozan-desaka.

Atombohy ny resaka

Mpanoratra, azafady Hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.