Miha-mampiasa ny aterineto hanaovana fampielezakevitra ny vondrona tia tanindrazana isan-karazany any Azia Atsimo Atsinanana. Na dia ny mpitondra politika aza dia mampiasa araka izay tratra ny serasera hampiroboroboana ny firaisan-kina sy ny fitiavan-tanindrazana ao amin'ny fireneny.

Mandrisika tokoa izany fironana izany rehefa manome fahalalahana ny olom-pirenena tsotra haneho ny fifikirany amin'ny vondrom-piaraha-monina lehibe misy azy. Maro koa anefa ireo antoko tia tanindrazana tery saina miditra an-tsehatra manimba ny firaisan-kinan'i Azia Atsimo Atsinanana.

Angamba ny vohikala miteraka adihevitra indrindra any Indoshina amin'izao fotoana izao dia ny ilovethailand.org na tiako i thailand. Natsangan'ny praiminisitra Thailandey io vohikala io mba hampiakatra ny lazan'ny firenena. Ny tanjon'ny vohikala koa moa dia ny manambatra sy mampahazo hevitra ny Thailandey izay maro no tsy faly amin'ny fifandroritana ataon'ny vondrona politika ao aminy.

Hitan'i Chang Noi ho paika ataon'ny governemanta thailandey ho teknikam-pampielezan-kevitra ny vahoaka ihany anefa ity fanentanana ity:

Tsy fantatry [ny roa tonta] manentana akory ireo mety ho antony lalina mampisongadina ny fisaratsarahana. Tahaka izany ihany koa ny tsy fahafantarany izay mety ho fanefitr'ireo antony ireo. Tsy fantany ihany koa fa mety hirotsaka lalina amin'ny sehatra politika ny olona satria heveriny fa adidiny izany ary mitady ny tombotsoan'ny firenena izy ireo. Te-hanafina ny tena olana ho any ambany tsihy ny roa tonta nefa mety hiotrika ao ny olana ka ho masaka

Nahatonga savorovoro ihany koa ny vohikala satria notakiany ho “anisan'ny tanin'i Thailand very” ny sasany amin'ny sombitanin'i Kambôdza.

Efa ampolony taona maro moa no nifandiran'i Thailand sy Kambôdza ho tompon'ny tempoly fahagola Preah Vihear . Efa imbetsaka io ampahantany io no niteraka ady mangotraka teo amin'ny mpiaro sisintany roa tonta.

Naneho ny fahadisoam-panantenany ny mpamaham-bolongana maro raha nisafidy ny hampiray hina ny iray firenena ny fitondrana Thailandey higidragidra firenena hafa any amin'iny faritra iny. Heverin-dry zareo fa tsy tokony hiroso amin'izany fandikana diso ny fitiavan-tanindrazana izany ny mpiserasera.

Araka ny efa nampoizina dia nitsipaka ampahibemaso amin'ny fomba diplaomatika ny fananganana io vohikala io ny governemanta Kambôdziana. Niteraka fananganana vohikala pro-Kambodziana tokoa manko io: ilovekhmer.org na tiako ny khmer. Ny tanjon'io vohikala io dia ny hampisehoana ny heverina fa filazana diso hita ao amin'i ilovethailand.org.

Samy lasa vavahadin-tserasera malaza sy be mpamaky any amin'ny firenena misy azy avy na ny ilovethailand.org [tiako i thailand] na ny ilovekhmer.org [tiako ny khmer]. Raha heverina ho efa tsara ny nifindran'ny fifandirana sisintany ho any amin'ny kianjan'ny serasera dia mampalahelo kosa fa lasa mandranitra ny fifankahalan'ny andaniny sy ny ankilany kosa izany.

Nahita ny hery vaikan'ny fampiasana ny aterineto hampivondronana ny fireneny ihany koa ny praiminisitra Maleziana. Ankoatra ny famahanam-bolongana sy ny fisiahan-tserasera [tweeting] fanaony isan'andro dia nanangana ny 1Malaysia.com.my ihany koa ny praiminisitra Najib Abdul Razak hametrahana “sehatra ifanakalozana” eo amin'ny mpitondra sy ny vahoakany. “1Malaysia: Vahoaka aloha, asa vita (performance) izao” no tarigetran'ny praiminisitra.

Nanangana ny vohikalany ihany koa ny mpikatroka pro-demaokrasia any Malezia ka nametraka ny lohahevitra hoe “1BlackMalaysia: Demaokrasia aloha, fifidianana izao.” Mihevitra izy ireo fa nanimba ny fototra demaokratika any Malezia ny mpitondra vaovao. Vao tsy ela akory izay tamin'ity volana ity dia nanangana takelaka Facebook sy bolongana ity vondrona ity ary mandrisika ny Maleziana hamorona sy hisintona afisin-tserasera “Aiza ny demaokrasia?”.

Efa noporofoin'i Indonezia fa ahafaha-mampivondrona mpiserasera ny voina nihatra tamin'ny firenena. Ora vitsivitsy taorian'ny fanapoahana baomba nahafatesan'olona nahazo an'i Jakarta tamin'ny volana lasa teo iny , dia nifandefa sioka hoe “tsy matahotra izahay” ny mpisioka an-tserasera Indoneziana [twitterrers]. Nandritra ny andro maromaro dia ny #indonesiaunite no fangitra [hashtag] nironan'ny olona be indrindra tamin'ny Twitter. Maro ny mpampiasa ny Plurk sy ny Facebook no nanova ny sarintavany ho loko mena sy fotsy ahafantarana ny fanevan'i Indonezia. Hitan'ny mpamaham-bolongana ao an-toerana ny tombotsoan'ny fampiasana famahanam-bolongana fohy (sa hataontsika hoe siokam-bolongana?) ahafahana manao zavatra haingana. Nitanaka vava ny mpandinika nahita ny tanora Indoneziana tsy manao politika niaraka tamin'ireo liana politika samy nanameloka ny fampihorohoroana an'i Jakarta.

Nanangona ny fanampiana tamin'ny alalan'ny paypal ho an'ny tra-boinan'ny tondra-drano tany Mindanao ny mpampiasa plurk tamin'ny fiandohan'ity taona ity. Nanampy ruban mavo tamin'ny sarintavany ho fahatsiarovana ny filoha teo aloha nodimandry tamin'ny faran'ny herinandro teo ny mpisioka an-tserasera (Twitter). Nahavory sonia sy mpanohana an'hetsiny, indrindra fa tao amin'ny Facebook ny fanangona-tsonia an-tserasera manohitra volavola hanitsiana ny Lalampanorenan'ny taona 1987.

Henjana ny fanentanana sy ezaka fanerena hampalalaka kokoa ny aterineto any Vietnam amin'izao fotoana izao. Tsy tambo isaina ny fanehoam-panohanana an-tserasera ny olomangan'ny fanoherana Aung San Suu Kyi avy any Myanmar. Mikofokofoka manao zavatra maro hahazoana fitia tsy mba hetra ho ana ekipam-panatanjahantena, sy tra-boinan'ny tondra-drano ary ireo vondrona mpiaro ny tontolo iainana isan-karazany ny mpamaham-bolongana any Brunei.

Lohahevitra malaza sy miteraka adihevitra be ny fitiavan-tanindrazana amin'ny aterineto. Mitozo sy mazoto hatrany ny mpanao politika sy ny antoko mpanohitra any Azia atsimo atsinanana hampiroboroboana ny fitiavan-tanindrazana. Misy ny lafy tsaran'izany firoboroboana an-tserasera izany hampandraisana anjara mavitrika ny olo-tsotra amin'ny resaka politika. Saingy ny lafy ratsiny kosa dia rehefa miteraka fifanilikilihana sy fankahalana vahiny ilay izy.

Manahirana ihany koa ny fampiasan'ny mpanao politika fampielezan-kevitra nasionalista azo iadian-kevitra ny serasera hanafenany ny zavatra tsy mety ataony. Na izany aza dia mitoetra ho fitaovana sy sehatra mahomby ho an'olona sy vondrona hiresahana lohahevitra matotra tahaka ny fitiavan-tanindrazana ny aterineto. Tsy tokony hanaiky fahatany ny sasany hanimba ny fampivelaran-tsaina ateraky ny fampiasana ny vohikala manerantany ny mpiserasera isam-paritra.

Mong Palatino

Ny oram-baratra tamin’ny volana lasa teo dia nahatonga tondra-drano sy fihotsahan-tany tao amin’ny firenena, izay nandrava trano maro misy fianakaviana miisa hatrany amin’ny 200 no mihoatra, nahaverezana tany sy voly antapitrisany tao amin’ny faritra efatry ny firenena. Izany  zava-nitranga izany no nahatonga ny mpiara-monina hiara-mientana hangataka fanampiana ho an’ireo tena tsy manan-katokona sy ireo ravan’ny herisetran’ny natiora.

Napetraky ny ministeran’ny fanajarina ny tany tamin’ny 3 Febroary 2009 ny teti-bolam-bahoaka hamatsiana ny fanampiana ireo tra-boina tamin’ny tondra-drano farany teo. Ny tanjona dia ny hanamora ny fahasahiranana mianjady amin’ireto tra-boina sy hiverenan’izy ireo amin’ny fiainany mahazatra. Satria singa iray ny ezaka fanangonana ireo fanomezana ho amin’ity famatsiana ity, dia narafitra mandritra ny herinandro vitsivitsy ny hetsika malala-tanana mba ho loharanom-bola nasionaly izay entina hamatsiana ireo tra-boina tamin’ny tondra-drano sy ny fihotsahan-tany. Ity no ohatra iray izay mampiseho fa mifanohana ny mpiara-monina ao an-toerana amin’ny alalan’ny fifanampian’izy samy izy ihany. Fiteny Malay ny hoe Masyarakat Perihatin izay midika hoe fiaraha-monina mifampitsinjo.

Ohatra, niezaka mafy ny trano fandraisam-bahiny antsoina hoe Orchid Garden Hotel hitondra ny anjara birikiny amin’ny alalan’ny mofomamy. Nahalafo mofomamy mihoatra ny 2 000 isa ity hotely ity. Tretrika tokoa izy nandranty fonosana mofomamy miisa 25 milanja ho 250kg. Ny hadirin’ireo fonosana rehefa atambatra dia mahatratra ho 84 x 84 santimetatra tora-droa ny velarany ambanty ary  192 santimetra ny haavony (7 pieds  X 7 pieds  X 16 pieds ).

Sarin’ny Strictly Beautiful

Mitatitra mahakasika izay fanomezana mofomamy izay i Ranoadidas ary koa mahakasika loharanom-bola hafa izay nahalafosana tapakila  ahazoana mihinana Nasi Lemak miisa 900, ilay sakafo malaza ao an-toerana:

Nahavita nandafo mofomamy 2000 isa ny fanomezan-tanana mofomamy tao amin’ny Orchid Garden Hotel. Isa lehibe tokoa izany. Nisy ihany koa ny hetsika malala-tanana tao amin’ny D’, toeram-pisotroana kafe sy trano fisakafoanana madinika , koa tao amin’izany no nandafosana tapakila Nasi Lemak miisa 900 (sakafo ao an-toerana vita amin’ny vary andrahoina miaraka amin’ny ronono azo avy amin’ny voanio) sy atody omeleta..

Sarin’ny  Ranoadidas
Nitatitra i AnakBrunei momba ny hetsika malala-tanana baolina kitra izay nahazoana vola mitentina B$ 100 000 avy amin’ny mpijery.

Lalao baolina nisy teo amin’ny DPMM FC sy FFBD XI. Nokarakarain’ny Federasionan’ny Baolina Kitran’ny Brunei ao Darussalam ny lalao. Hatao fanomezana ho amin’ny famatsiana ny tra-boina tamin’ny tondra-drano sy ny fihotsahan’ny tany ny vola rehetra azo tamin’io lalao io (manakaiky ny B$100 ny teti-bola araka ny vaovao azoko).

Ny sary etsy ambony dia mampiseho ny Voninahitra Avo ananany dia ny Satro-boninahitry ny Printsy, Filohan’ny DPMM Football club manome ireo vola voaangona avy tamin’ny hetsika malala-tanana baolina kitra ho eo am-pelatanan’ny filoha mpiandraikitra ny tondra-drano sy ny fihotsahan-tany.

Tahaka ny firenena manerana ny bolan-tany, tsy ho lany olona mazoto hanao fanamby ka hametraka ny firenena ao anatin’ny saritan’izao tontolo izao I Brunei. Iraka 2 no notanterahina.

1. Tovovavy an-tendrom-bolantany (filles du cercle polaire).

Mpitoraka blaogy miaraka amin’ireo vehivavin’ny tendrom-bola-tany, sary manaja entin’ i Ranoadidas

Nanao tatitra i Ranoadidas mikasika ny dian-tongotra fitadiavam-bola ho an’ireo vehivavy roa fantatra amin’ny anarana hoe “ireo vehivavin’ny tendrom-bola-tany”, izany dia mba hamatsiana ny dian’izy ireo mankany Norvejy handray fiofanana, ka ny iray amin’izy roa vavy ihany avy eo no ho voafidy mandray anjara amin’ny iraka ho n’ny vehivavy repoblikana any Antarktika(Commonwealth Women’s Antarctic Expedition) andraisan’ny firenena fito hafa anjara. Vehivavy avy ao Brunei, Cyprus, Ghana sy Jamaica no olona voalohany avy any amin’ny taniny hikorisa ambonin’ny ranomandry eny amin’ny tendro atsimon’ny bolatany. Hiady anaty tafiotran-dranomandry ry zareo, anaty kisilasila, ary anaty mari-pana ambanin‘ny -30*C raha toa ka 800 kilometra ny lalana miala ao antarktika mankany amin’ny tendro Atsimo ara-jeografika. Ny fanombohan’ny iraka araka ny tokony ho izy dia ny 10 Marsa 2009.

Najanon’i Dk Aniza ankehitriny ny fianarany ao amin’ny Sekoly ambaratonga faharoa Bedford (Lycee) ho amin’ity hetsika ity. Ilay mpianatra izay mikendry ny ho lasa « vehivavy Indiana Jones aziatika » dia miteny fa te handray anjara amin’ity hetsika ity izy, ka tsy hoe hanome laza an’i Brunei fotsiny ihany fa kosa hametraka tantara sy hanao izay mety amin’ny fahafahana mandray anjara eo amin’ny hetsika iraisam-pirenena toy izao.

Mpanampy ao amin’ny Minisiteran’ny raharaham-bahiny I DK Najibah Eradah, 25 taona. Teo aloha dia mpampianatra kajy (mathematique) tao amin’ny sekoly ambaratonga faharoa fototra nandritra ny telo taona izy, manantena I Era fa ny fandraisany anjara amin’ity iraka ity dia ahafahana manamafy ny fampitandremana entin’I Brunei momba ny fiakaran’ny hafanan’ny bolatany sy ny fiovaovan’ny toetr’andro.

2. eny amparavodilanitra.

Raha anisan’ny ezaka ataon’izy ireo amin’ny fankalazana ny faha-25 taonan’ny fahaleovantenan’I Brunei, dia hisy ny ekipa mpivady, Harun sy Norhayati. Rangahy vadiny no handray ny iraka lava indrindra manomboka ny Marsa 2009 ka hatramin’ny Octobra 2010, izay manivaka an’I Siberia/Rosia/Mongolia ary Kazakhstana/Irana/Syria rehefa eny an-dalana mankany Eropa iny ry zareo, avy eo mahazo an’I Angletera ao aorian’ny 25 000 km. Hitodi-doha mianatsimo ry zareo amin’ny alalan’I Frantsa sy Espana mankany Moroko ary manaraka ny sisin-dranomasin’ny Afrika andrefana mandrapahatonga any Cape Town, Afrika Atsimo. Rehefa avy eo dia aondrana mankany Buenos Aires Argentina ny fiara natokan’izy ireo ho an’ny iraka, ary mandeha fiara mikorisa midina hatrany Ushuaia izy ireo, ilay tanana farany indrindra alohan’ny Antarktika, dia avy eo manapaka an’I Amerika iray manontolo mandrapahatonga any Alaska, alohan’ny hiverenana any Brunei ny Oktobra 2010.

Sary ny eny amin’ny faravodilanitra

Tsy vahiny amin’ny iraka fahobe I Norhayati sy Harun raha nandray ny lalana nanapaka an’I Afrika izay niala tao Afrika Atsimo mandrapahatonga any Ostralia tamin’ny taona 2007. Norhayati no olona Bruneiana voalohany olona Broneiana voalohany nahavita nitety ny firenena 13 na nandeha 21 000 km miala avy ao Eropa, Proche Orient hatrany Afrika Avaratra miaraka amin’ny fiara tsy matimanota (4X4) tamin’ny 1999. Nitarika ekipa iray misy vehivavy 5 tao an-toerana izy mba hianika ny tendron’I kilimanjaro, io ny ekipa aziatika voalohany nahavita nianika ny tendrombohitra volkanika avo indrindra eto amin’izao tontolo izao tamin’ny taona 2001, mba entina hanamarihana “tsidiho ny herintaonan’I Brunei”

Mirary fahomobizana ary ataovy tretrika ny firenenao!

Nitohy tsy nijanona sy nanampoka ny maro ilay ora-mikija tsy ela akory izay. Nitarika fahatapahan’ny herinaratra, tondra-drano sy fihotsahan’ny tany izy io. Maro ireo toerana ambanivohitra no tsy azo aleha noho ny fiakaran’ny rano sy ny fihotsahan’ny tany tamin’ny omaly alina tao Sungai Liang, ka efa saika nipaka teo amin’ny lala-migodana mampifandray ny renivohitra sy I Kuala Belait izay faritra andrefan’ny firenena.

Efa niezaka nanohy ny fanadihadiana ireo toerana tra-boina ny ankamaroan’ny bolongana ao an-toerana anisan’izany BruneiMotors, ary koa nitondra hetsika fampandrenesana mialoha ho fanairana ireo mpitondra moto eny amin’ny faritra misy ireo loza ahiahiana vokatry ny fihotsahana ary koa ny fitohanan’ny fiara. Ny fampiasana ny saritany google no ahafahan’izy ireo mampiseho mazava tsara ireo toerana tra-boina. Nomena ny toromarika hoe ahoana ny fomba fitondrana fiara ao anaty ora-mikija ary amin’ny fomba ahoana no iarovana ireo fiara tsy ho azon’ny tondra-drano
.

Naseho ihany koa ireo firaiketana horonantsary milaza ireo tratran’ny tondra-drano .

Born to be Pisces (Teraka ho dobon-trondro) mitantara ny tondra-drano tao amin’ny tananany, Tanjung Maya.

Jereo fotsiny anie ny sary etsy ambony e. Azo sary izy ireto omaly mialoha ny andehanan’I Turun Keraja (hiasa).Antenaina fa hanome lakana na apakah (zavatra) ho azy ireo ny fitondrampanjakana mba ahazoana miampita ny toerana isian’ny tondra-drano mahery. Namaky ny gazety di Ukong ada aho androany fa (nisy) olona ambanivohitra nianjeran’ny vato kaiii…..tsy dia novakiako tanteraka koa ilay izy. Heritrereto an-tsaina hoe ny voay bersantai dapan rumah kami. (maka aina eo anoloan’ny trano).. tokony ho vonona raha hujanlagi turun androany.

Milaza ihany koa KB Happening momba ny tondra-drano izay nitondra fahasimbana fiara sy trano

Manome sarin’ny fihotsahan-tany izay nanapaka ny fifamoivoizana tao Penanjong i Jidule.

Hita fa hiaritra orana matetika ny mponina ao anatin’ny andro maromaro manaraka. Nametraka akaiky ny fanadiadiana isan’andro mandritra 24 ora ny ivo-toerna nasionaly misahana ny fandrindrana ny loza voajanahary (NDMC) ary miara-miasa amin’ny sampan-draharaha misahana ny fifandraisana ao an-toerana, DST, mba handefa hafatra SMS entina hanairana ny mponina ao an-toerana manoloana ny ora-mikija sy ny korontana avy amin’ny toetr’andro

Senor Pablo

Maro ny toeram-pivarotana manohy mivoha hatrany saiky amin’ny faritra maro ao Brioney. Mba hahafantaranao azy mialoha, haka toeram-pisakafoanana iray vaovao isika, dia toeram-pisotroana dité sy kafe iray vaovao, toeram-pivarotana kojakojan-tokantrano iray vaovao, na toeram-pandraharahana ara-barotra goavana iray vaovao, raha tsy hilaza afa-tsy ireo. Fanampin'izay, ny ankamaroan'ireny fandraharahana ireny dia ny Maley Broneianina no mitazona azy - foko maro an'isa indrindra eto amin'ny firenena. Entina hanaporofoana izany fa tsy sahirana velively ny Maley mitady vola ho entin-manomboka asa fandraharahana iray, na ny fananana fahaiza-manao mba ho lasa mpandraharaha. Indrisy anefa, na dia miroborobo aza ny fandraharahana anatiny natsangan'ireo Maley, ny ankabeazan'izy ireny dia tsy ny tompony no manodina azy. Lazain'i Rouge economist io tranga io hoe toy ny soritroritr' ‘Ali Baba’ :

Raiso ho ohatry ny soritsoritr'‘Ali Baba’ ny sehatry ny fandraharahana. Te-hanan-karena amin'ny fomba mora sady malaky be isika. Raha tokony isika no hanodina ny orinasa dia lasa mivarotra na mampanofa ny fanomezan-dalantsika amin'ny olona avy any ivelany. Vokany, Tsy mihoatra ny rantsan-tanana folo ny isan'ny Maley Brioneiana izay lasa mpandraharaha azontsika ireharehana raha ampitahaina amin'ny isan'ny toeram-pandraharahana ara-barotra (indrindra ny ‘kedai runcit’, ny trano fanetezana ary ny mpanjaitra). [‘Kedai runcit’ no iantsoana ny fivarotana enta-madinika]

Sary avy amin'i Anak Brunei

Ny governemantan'ny Brioney dia miezaka ny haha-marolafy ny toe-karem-pirenena amin'ny alalan'ny fandrisihana sy fampivoarana ny harena ara-olona. Tsy hahomby anefa izany hevitra sy tetik'asa fampandrosoana izany raha tsy mivoatra ny olona. Ny kolo-tsaina Broneianina ihany koa dia efa sakana manohitra ny ezaka fampandrosoana ny toe-karena. Ny Rouge Economist ohatra dia manoritsoritra ny toe-tsain'ny Maley broneianina any am-piasana:

Ohatra hafa no maneho ny toe-tsain'ny Maley broneianina any am-piasana. Tafiditra ao anatin'ny kolo-tsain'ny fitantanana ny fiatoana misotro dite amin'ny dimy ora. Ny toetran'ny ‘karang tah’ [translation: “Amin'ny manaraka angamba”, na “Hataoko io aoriana kely ao.”] no nahatonga ny governemanta very dollars an-tapitrisany maro eo amin'ny sehatry ny famokarana ary teo amin'ny fampidiram-bola. Vokatr'izany, ny raharaham-bahoaka, izay asa tena voalohan-tsafidin'ny Brioney Maley, dia milona, tsy mamokatra sy tara ka indraindray aza dia herinandro maro no isaina izay vao mahatonga taratasy any amin'ny distrika kely iray, ary amam-bolana vao mahazo valiny ny fangatahana iray. (Oadray, izany ve no samy taritary avy any an-tanàna?)

Noho izany dia zava-dehibe loatra ho an'ny Brioney ny manorina tontolo afaka handrisika ny Maley manokana hamokatra bebe kokoa sy ny Broneianina rehetra amin'ny ankapobeny. Raha tsy mivoatra ny vahoaka mpanodika ireny seha-pihariana ireny dia mbola nofinofy lavitra dia lavitra ny fandrosoana.