Global Voices amin´ny teny malagasy » Armenia

Arimenia: Mpamaham-bolongana nanatrika valandresaky ny Filoham-pirenena

Jentilisa — Wed, 23 Jul 2008 04:38:00 +0000

Real Armenia no nilaza fa mpamaham-bolongana roa ao an-toerana, Akanumatata_Ser [RU] sy Pigh [RU], no nahazo alalana hanatrika valandresaky ny filoham-pirenena ary hanontany izay fanontaniana voangona an-tserasera. Niarahaba ireo mpamaham-bolongana io bolongana voatonona voalohany io ary nolazainy fa tokony hitovy lenta amin'ny manao gazety ao an-toerana amin'izay ny mpamaham-bolongana.

Arimenia: Sigara amantarana firenena

Jentilisa — Sat, 19 Jul 2008 07:08:48 +0000

Stuff Armos Like, mijery tsy misorona ny fahazaran(-dratsy) Arimeniana, no miteny fa raha mahazo vahana fatratra any amin'ny faritra maro hafa ny vondrom-panerena hanoherana ny fifohana sigara, dia azo heverina ho mamaka lalina amin'ny zavamisy Arimeniana kosa ny sigara. Vazivazian'ny bolongana moa fa na ho voarara any amin'ny firenenkafa rehetra aza ny fifohana sigara, dia mbola manana ny ho aviny kosa ny mpanao sigara any Arimenia.

Arimenia: Baolina politika

Jentilisa — Sat, 12 Jul 2008 21:06:33 +0000

Unzipped no milaza ny heviny avy amin'ny tenin'ny filoha vaovaon”i Arimenia navoakan'ny Wall Street Journal ahitana ny fanantenan'i Serge Sargsyan fa mety hiteraka fifandraisana eo amin'ny tany roa tonta ny fihaonan'i Arimenia sy Torikia amin'ny baolina fandaka hifanintsanana ho amin'nyfiadiana ny amboara erantany amin'ny volana septambra ho avy izao. Mikatona tanteraka manko ankehitriny ny sisitany iraisan'i Arimenia syTorikia.

Iran: Toerana maro noraisina ho vakoka iraisam-pirenena

Jentilisa — Sat, 12 Jul 2008 04:29:05 +0000

Blogian no miresadresaka amintsika ny fampidirana ny monasitera Armeniana 3 any Iran ho ao anaty ny lisitry ny vakoka iraisam-pirenena alahatry ny UNESCO. Raha nahafaly ny mpamaham-bolongana izany hetsika izany, dia nahasosotra azy kosa ny tsy nihetsehan'ny UNESCO raha nisy vohitra Armeniana any ankodahodan'i Azerbaijan any Nakhichevan rava.

Armenia: Blaogin'ny fanabeazana

avylavitra — Tue, 08 Jul 2008 19:04:50 +0000

Tsy ihambahambàna fa miha-matotra ny fitoràhana blaogy any Armenia nandritra ny sehatra iray manokana tena anjakan’ny resaka kolikoly amin’ireo faritry ny firaisana sovietika teo aloha..

Araka ny blaogim-panabeazana Transitions Online, Chalkboard (solaitrabe), tsy tranga maningana irery akory i Armenia raha ny fitarazohan’ny fanovany.

Raha midehaka ho mametraka drafi-panabeazana maoderina sy afaka mifampitaha ny governemanta ao Armenia, mifanaraka amin’ny tondro-zotra tany Bologne, dia betsaka amin’ireo Armeniana no mihevitra fa ity tetezamita ity dia tsy mitondra afa-tsy fahamafisan’ny olana efa sedraina amin’izao fotoana. Na eo aza ny drafitra mampilendalenda aroson’ny Ministeran’ny Fanabeazana, ireo sekoly Armeniana dia manohy hatrany ny adiny amin’ny tsy fahampian’ny fitaovana sy ny mpampianatra matihanina, indrindra fa any amin’ny faritra ambanivohitra, noho ny hakelin’ny teti-bolam-panjakana ho an’ny fanabeazana, 3,2 % monja amin’ny harin-karena faobe (PIB), araka ny tarehi-mariky ny Banky Iraisam-pirenena farany.

Manjary ivon-dresak’ireo blaogy samihafa miresaka manokana an’i Armenia sy ny faritra atsimon’ny Caucase ny fanabeazana. Ohatra ny The Armenian Economist, mitsikera ireo drafitry ny governemanta handrotsaka vatsim-pianarana ho an’ny mpianatra mba hahafahan’izy ireny mianatra any ivelany. Ity blaogy ity dia mihevitra fa tsara kokoa raha ampiasaina amin’ny fanatsarana ny rafi-pampianarana ao an-toerana izany vola izany.

Tsy ela akory izay dia nilaza ny Praiminisitra fa ny governemanta dia hamatsy ny fianarana any ivelany ho an’ny mpianatra vitsivitsy. Tsy asiana adihevitra fa fanamafisana ny filàn’ny firenen-tsika hanangana foto-drafitrasa sahàza ho fandraisana ireo mpianatra izany ary fanehoana ny fanatsaràna zàra raha misy eo amin’ny tontolon’ny anjerimanontolony.
[…]
Ny mifanohitra amin’izay, ireo fahafahà-manao kely ananantsika dia tokony ampiasaina hisarihana mpampianatra ho aty amin’ny firenentsika. Azo atao tsara amin’izay ny mamolavola mpianatra maro ao. Ary, mbola mavesa-danja kokoa, mety mba hivoatra ireo anjerimanontolo efa misy, ka mety mba hanolotra fanofanana mendrika kokoa.
[…]
Raha fintinina, dia ireo toeram-mpampianarana anjerimanontolo-ntsika no mila hamafisina. Raha tsy izany, ny fanavaozana ny fahafahantsika mandray (capacité d'accueil) dia hitohy hiadam-pamindra foana.

Armenia Higher Education & Sciences, blaogin’i Aryana Petrova izay mpampianatra eny amin’ny ambaratonga ambony ary consultante dia mitsikera koa ny politikan’ny governemanta armeniana momba ny anjerimanontolo. Rehefa nanontany tena izy raha tena afaka mametraka ireo fanavaozana izay “tsy ampy hatrizay ela izay” tokoa ao amin’ity “sampan-draharaham-panjakana isan’izay tsy alehany ity”, ny Minisitra vaovao misahana ny Fanabeazana sy ny Siansa, dia notsiniany ireo fepetra tsizarizary tsy maintsy iasan’ireo mpikaroka.

Matetika no ambara amintsika fa raha manana otrikarena voajanahary sesehena ny mpifanolo-bodirindrina amin’i Armenia, manan-jàra kosa i Armenia amin’ny fanànany ny olony. […]
Ny olan’ny fahaiza-manao ara-tsaina (capital intellectuel) dia noho izy, tsy toy ireo loharano hafa, fa mora mifindra toerana ary raha tsy arovana, amporisihana ary karakaraina, dia mora mihitsy ny manondrana azy. Maro ireo firenena mihàza talenta vao avy any ivelany mba hampivoarany ny teo-kareny manokana, izay miteraka fatiantoka ho an’ireo firenena nilaozan’ireny talenta ireny amin’ilay antsoina hoe “fandosiran’ny atidoha”.
Ao anatin’ity tranga faharoa ity no misy an’i Armenia : iharan’ny fifindran-toeran’ny atidoha izy amin’izao fotoana izao. […]
Marina fa nihena kely ny fifindran-toerana nandritra ireo taona farany vitsivitsy, saingy tsy foana kosa akory. Ny fahafaha-mikaroka sy mamorona ananan’ny firenena dia mitontongana isak’izay taona mifandinby, ary mbola hitohy mandritry ny fotoana ela io toe-javatra io raha tsy misy fepetra fanavaozana goavana raisina ho an’ny fanabeazana sy ny fikarohana.

Liana amin’ny toeran’ i Armenia eo anivon’ny TIMSS (Trends in International Mathematics and Science Study) ny blaogy Social Science in the Caucasus, fanomezana laharana eran-tany ho an’ny dingan’ny mpianatra (hakingan-tsaina) (izay mifandraika amin’ny CM1 sy 4e ho an’ny frantsay). Manontany tena izy raha tena maneho tokoa ny tena zava-misy ny vokatra navoaka ary mangataka fikarohana bebe kokoa momba io resaka io, no sady maniry ny hevitry ny mpamaky azy ihany koa.

Voka-pikarohana hafa natao tao Armenia no toa milaza fa tsy dia tena azo lazaina ho mahasolo-tena ny maro loatra ny fantina nataon’ny TIMSS. Raha tena azontsika tsara izay lalan-kevitr’izy ireo, ireo mpanoratra ity fikarohana ity dia manontany raha avy amin’ny ambaratonga antonontonony na avy amin’ny ambaratonga ambony ireo mpianatra Armeniana nofantenan’ny TIMSS . Izay mety ho azo adika fa tsy dia hita loatra tao ireo mahantra. Mety ho lohahevi-pikarohana iray tsara trandrahana koa izay (tsy misy mpikaroka tena havanana ve, eto ?).

Ndeha hatao hoe ny lohahevitra toy ny fanabeazana dia mitohy foana ny fandrakofana azy, tena azo asandratra ho isan’ny fitaovan-tserasera mendrika tokoa hiresahana ny olana manolo-koditra ireo blaogy tahaka itony. Azo raisina ho fitaovana tsara mba hitondràna ny mangarahàra amin’ny ady mafin’ny fanavaozana ny rafi-pampianarana anjakàn’ny kolikoly sy ny tsy fahombiazana koa itony, ho an’ireo firenena toa an’i Armenia.

Ohatra, tamin’ny 2006, ireo mpianatra vahiny tao amin’ny Anjeriomanontolom-panjakana Fianarana Mitsabo ao Erevan [Yerevan State Medical University (YSMU)] dia namorona ny blaoginy azy manokana taorian’ny fihetsiketsehana naterakin’ny fahafatesana tsy mazava nanjo ny mpianatra indiana iray. Na dia nofafàna aza izy io taty aoriana, dia fiandohan’ny blaogy ho fanomezan-danja ny mpianatra sy ho fanerena ny hisian’ny mangarahara bebe kokoa eo amin’ny tontolom-pampianarana.

Armenia : Kolikoly sy Fialana bala

Tomavana — Tue, 08 Jul 2008 12:00:31 +0000

Blogrel no mitatitra fa noroahina nohon'ny kolikoly ny talen'ny sampan-draharaha miandraikitra ny fanavaozana ny Pasipaoro (OVIR) any Armenia. Anefa dia velom-panontaniana koa i Unzipped izay antony tsy nisian'ny fitoriana ara-pitsarana ho tohin'izany raharaha izany, tena marina ve fa miady amin'ny kolikoly sy ny tsolotra tokoa ny fanjakana fa tsy vazivazy ?.

Armenia : Ny andron’ny ankizy

Jentilisa — Mon, 02 Jun 2008 19:16:37 +0000

Nolazain’i Unzipped (tsy voafintina) fa somary nihilana ho amin’ny lafiny politika kokoa tamin’ity taona ity ny fanamarihana manerantany ny andron’ny ankizy, isaky ny voalohan’ny volana jona, nomarihan'ny fianakavian’ireo mpanohitra notazonina am-ponja omaly (voalohany volana jona)tamin’ny alalan’ny fihetsiketsehana nataony teo akaikin’ny biraon’ny lehiben’ny fampanoavana sy ny masoivohon’ny Firenena Mikambana tao afovoan-tanànan’ Yerevan izany. Miantso no governemanta armeniana ny bolongana mba tsy hanao fanambarana momba ny zon’ny ankizy, fa hanome valiteny mahafapo ny fangatahan’ny (masoivoho) iraisam-pirenena hamotsorana ny rain’izy ireo, maro amin’izy ireo manko no voafonja noho ny fazotoana politika ananany

Armenia: Kolontsaina hafa

Jentilisa — Thu, 17 Apr 2008 04:09:48 +0000

Manoratra ny kolontsaina mety ho hafahafa amin'ny vahiny miaina any Armenia i Dominic. Tsy maintsy miatrika ny fifampitantanan'ny olona amin'ny fandihizana tampoka eny an-dalana, marihin'ingahy mpanolotenan'ny tafi-pandriampahalemana moa fa mahitsy fo kokoa ny Armeniana amin'ny fitsikerana ny hafa.

Armenia : An'iza ny fitantanana ny rano ?

Tomavana — Fri, 04 Apr 2008 13:12:32 +0000

Ny blaogin'ny lalàna mikasika ny rano na Water Law Blog dia mamakafaka ny toe-draharaha mikasika ny famatsiana rano fisotro sy ny famalanana rano avy nampiasaina any Armenia, taorian'ny fianjeran'ny firaisan'ireo fanjakana Sovietika sy ny fitsofohan'ireo orinasa Frantsay amin'ny fitrandrahana izany :

In Armenia, domestic water supply and sewer services are supplied either by local municipalities or State owned stock companies.

The State’s report in support of its privatization conclusion makes an all or nothing conclusion: In order to provide efficient and cost effective water services to all Armenia, private companies should provide water throughout Armenia, both in urban and rural areas. While the report recognizes that individuals can be self supplied by wells, it fails to mention or address the effectiveness of self-regulated and owned small community water associations.

Any Armenia, eo am-pelatanan'ireo rafitra fitondram-panjakana na ireo orinasa izay ambany fiadidian'ny fanjakana ny fitantanana ny famatsiana rano fisotro sy ny famalanana rano avy nampiasaina.

Ny valin'ny fanadihadiana nataon'ny fanjakana izay mitarika any amin'ny fialan'andraikitry ny fitondrana fa fivarotana izany amin'ny orinasa, dia manao fehinkevitra karazany “na alaivo daholo na ialao” [tsy misy marimaritra iraisana] : Mba hahatomombana ny fitantanana sy ny tolotra rano fisotro manerana an'i Armenia, ireo orinasa izay tsy miankina amin'ny fanjakana dia tokony hanome tolotra manerana ny firenena, sady an-tanàna no eny ambanivotra koa. Na dia marihin'izany tatitra izany aza fa afaka vatsiana amin'ny alalan'ny vovo fatsakana koa ny tsirairay, adinony ny manamarika fa na mampivoitra ny fahombiazana sy ny fahaiza-mitantana izay nasehon'ireo fikambanana madinika mitrandraka ny rano.

Armenia: Kolontsaim-panoherana

Jentilisa — Wed, 19 Mar 2008 09:16:56 +0000

Nanoratra ny heviny momba ny taratasy misokatra nosoratan'olomalaza dimy any amin'ny taranjan-kolontsaina manavanana azy avy ka voasoratra ao ny toe-draharaha politika any Armenia i Unzipped. The signatories Nanolo-kevitra ny hisiana fifidianana solombavambahoaka vaovao indray ireo mpanao sonia hamahana ny olana nateraky ny fifidianana ho filoham-pirenena tamin'ny 19 Febroary lasa teo ka nahatonga izao toe-draharaha ampiharana ny tany misy hotakotaka izao.