Na dia mangina aza ny tontolon'ny bilaogy amin'ny ankapobeny dia nisy zava-niseho maro tany Malawi tato anatin'ny herinandro vitsivitsy izay.

Vao tamin'ny faran'ny herinandro teo dia nanao ady sahala tamin'ny Elefantan'i Côte d'Ivoire i Malawi ary anisan'ny mpilalao tamin'izany i Didier Drogba, mpilalao avy any Chelsea. Tao amin'ny kianjan'ny Kamuzu no natao ny lalao. Buckaro Thandi no nanoratra mikasika ny ady mafy natrehan'i Malawi nanoloana ny Elefanta:

Hoy izy nanoratra fohy:

Arahabaina fa nanao ady sahala tamin'i Cote d'Ivoire. Tena nahafinaritra. Horakoraka be!

Any amin'ny lahatsoratra nataony taloha no nilazany ny alahelony noho ny tsy fahampian'ny herinaratra vokarin'ny ESCOM any Malawi. Tsy nino izy hoe 2% ny mponina any an-toerana ihany no mahazo herinaratra (ny tena marina dia 8%). Noho izany dia nahafinaritra azy ny tantaran'ilay tovolahy antsoina hoe William Kamwamba, 21 taona, izay efa ho 7 taona izao no nanamboatra milina famokarana angovo avy amin'ny rivotra ary vao nivoaka boky vao haingana.

Ny lohatenin'ny boky dia hoe “Ilay tovolahy nitrandraka rivotra “

Ahafahana mamokatra herinaratra hampirehetana takamoa maromaro sy hihainoana vata fandraisam-peo any an-tokantrano ity milina ity. Lasa fanta-daza i William tato anatin'ny 3 taona izay raha narahan'ny mpanao gazetin'ny Daily Times ny tantarany tany Kasungu tokony ho 150 km miala ny renivohitra Malawi. Ankehitriny ilay mpianatra ao amin'ny anjerimanontolon'ny Africa Leadership Academy, hireharehan'i Malawi tokoa i William ary lasa olo-malaza atao loohatenin-gazety sy firesaka ao amin'ny aterineto.

Ndagha no mitantara ny fifandraisany manokana amin'ity tovolahy:

Rehefa mifandray aminy, dia mahatsapa ny fitiavany hampivoatra ny lafiny elektronika any Malawi sy ny any ivelany aza. Mpirona kokoa any amin'ireo sahirana izy satria ny tantarany manokana dia mitovy amin'ny fanamby atrehin'ny fianakaviany sy ireo teratany Malawita maro hafa koa. Tovolahy tapa-kevitra amin'ny fanovana tiany hatao izy. Heveriko fa arakaraky ny maha eo azy dia mitombo hatrany ny hetezerany manoloana ny lafiny angovo any Malawi. Rehefa tonga ny fotoana mahamety azy, dia azoko antoka fa mbola hahavita zavatra goavana izy.

Noho izany na dia mangina aza ny tontolon'ny bilaogy dia misy ihany ny zavatra miseho sady resahan'izao tontolo izao.

Victor Kaonga

Nanomanana Barcamp fanao isan-taona tao amin'ny Anjerimanontolon'i Paññasastra ao Kambôdja tamin'ny fiandohan'ity volana ity.

Ireo nisoratra anarana hanatontosa ny Barcamp Phnom Penh Barcamp. Ity no taona faharoa nanatontosana Barcamp tao Phnom Penh. Efa nanao vovonana ny mpamaham-bolongana Kambôjiana tamin'ny 2007.

Tsy misy lisitry ny handray fitenenana, na manampahefana hikabary, amin'izany Barcamp izany. Afa-miteny avokoa izay manatrika barcamp rehetra.

Mpanatrika Barcamp mieritreritra izay lohahevitra hataony.

Ny hany ataonao dia ny mametaka lohahevitrao eo amin'ny solaitraben'ny [fafana] fandaharam-potoana sy ny manangona olona maromaro handray anjara amin'ny anjara fotoananao.

Ireo handray fitenenana eo ampikarakarana ny halahany rehefa nametraka ny lohahevitra hodinihiny eo amin'ny solaitrabe.

Mihamalaza tahaka ny any amin'ny faritra hafa ihany koa izany Barcamp izany any Azia Atsimo Atsinanana. Manintsona ny olona ny hetsika tsy misy antanatohatra, ary asaina avokoa ny rehetra hizara ny fahalalany.

Ireo mpandray anjara mijery izay lohahevitra hatrehiny.

Kambôjiana eo ampanolorana fifampizarana tsara fehy.

Sajal avy any Thailand miresaka ny fanatsarana atao amin'ny vohikala vaovao mba ho mora hita kokoa ao amin'ny Google.

Fotoana amin'ny teny Khmer

Fahamaroan'isan'ny vahiny ivelan'ny firenena be indrindra nanatrika ny barcamp tao Phnom Penh.

Navitrika dia navitrika tamin'ny fitadiavana namana hiray donak'afo aminy tamin'ny alalan'ny aterineto ny mpamaham-bolongna sy ny mpiasan'ny teknolojia Kambojiana. Tsy miambàkavaka amin'ny teny anglisy ny tanora Kambôjiana ary mampiasa matetika amin'ny teny anglisy, izany no ahazoany olona maro kokoa avy any amin'ny firenenkafa.

Maro tokoa ireo fikambanana tsy miankina amin'ny fanjakana any Kambodja no mitrandraka ny fomba fampiasana ny aterineto sy ny teknolojia amin'ny fampandrosoana sy ny fahasalamana. Fotoana nanararaotana ny hijerena ny asan'izy ireny ny Barcamp any Kambodja.

Mitsiky eo anelanela'ny takelaka dokambarotra i Pagna angasy nananana sy vy nahitana tamin'ny fanatontosana ny Barcamp tao Phnom Penh.

Ny tena mampiavaka ny fihetsiketsehana miresaka teknika any Kambodja dia ny fahamaroan'isan'ny vehivavy mpandray anjara. Tsy vitan'ny mandray anjara tsotra fotsiny izy ireo fa mikarakara sy manolotra lohahevitra ihany koa.

Thomas, mpamaham-bolongana sy mpandray feo avy any Alemaina, miresaka momba ny MindMapping [manao endrika an-tsarintany ny eritreritra?]. Tsy mianona amin'ny resaka teknolojia ihany ny fandaharam-potoana. Eo ihany koa ireo miresaka ny fanolorantena, serasera sosialy, fanabeazana ary ny lalao.

Ny mpanatrika Thai-Japoney 31o5 miresaka momba ny tetika [systeme] iray ahafahan'ny tsirairay mampiditra ny nofinofiny sy manadihady azy ireny [na mametraka ny nofiny sy mandinika izay lazainy].

Ny mpandray anjara Vietnamiana Hung miresaka ny momba ny serasera sosialy any Vietnam

Tamin'ny fomba ahoana moa no nahazoan'i Kambodja olona avy amin'ny firenena manodidina hanatrika ny fotoana? Ankoatra ny fahaiza-manaon'ny tanora, dia singa iray lehibe ihany koa ny fitomboan'ny tetibola ho an'ny fifamoioizana an-habakabaka izay mahatonga ny fivezivezena ho mora. Be ihany koa ny hofantrano [na hofana trano fandraisam-bahiny] any Kambodja. Samy mandoa ny laniny amin'ny diany sy ny fivahiniany ny tsirairay, izany toe-javatra ara-toe-karena izany no mampazoto ny olona ho any.

Mpikarakara sasany eo ampialana sasatra vetivety. Araka ny hitanao dia tanora Kambojiana tia ny haitao ny akamaroan'izy ireo. Eo ampitondrana ny revolisiona [sy politika] teknolojika sy fampahalalam-baovao tokoa ny tanora any Kambodja ary mavitrika amin'ny fampiasana Facebook, Twitter ary ny fitaovan'ny bolongana.

Pagna (Kambojiana) miresaka amin'i SK (Thailandey) amin'ny antony mahatonga ny tanora Kambojiana ho mailaka kokoa noho ny Thailandey. Efa hatramin'ny taona maro ny tany Thailand no efa vita amin'ny tenindreniny ny fanovozam-pahalalana resaka solosaina. Ny ankamaroan'ny Kambojiana kosa indray dia tamin'ny teny anglisy no nanaovany dingana voalohany ny fahalalana sy ny fampiasana ny solosaina.

Manana olam-pifandraisana noho ny fiadiana ny ho tompon'ny tempoly iray i Thailand sy i Kambodja. Nahafinaritra ery ny nahita ny tanoran'ny roa tonta miara-mipetraka sy miady hevitra ary mifampianatra.

Miresaka momba ny camp teknolojika sy fampahalalam-baovao [mety hataony] any amin'ny faritra antsoina hoe Camp TIC Mekong ny mpanatrika Thailandey ary maka hevitraamin'izay atrehiny.

Tamas, mpandray anjara Hongroà-Thai miresaka momba ny fototry ny fitoriana fototry ny aterineto sy ny teknolojia.

Tapitra teo ny Barcamp Phnom Penh ary manantena ny hihaona aminao indray amin'ny herintaona.

Jereo koa: Tharum Bun's account of Barcamp Phnom Penh 2009

Preetam Rai

Marwa Rakha

Nandalo tany Taiwan ny rivo-doza Morakot ny 07 aogositra 2009 lasa teo. Nampirisika ny mponina tany amin'ny faritra avaratra hiomana amin'ny fiavian'ny orambe sy ny rivotra mahery ny biraon'ny famantarana ny toetr'andro tany an-toerana. Kanjo ny faritra atsimo no nitondra faisana tamin'ny tondra-drano sy ny fahasimban'ny fambolena raha nampitahaina tamin'ny faritra avaratra, indrindra tamin'ny namelezan'ny Morakot ity nosy ity ny 08 aogositra tokony ho tamin'ny 2 ora tolakandro.

Nihoatra noho ny rotsaka isan'andro ny oram-be tany Chiayi, Tainan, Kaohsinung ary tany Taitung izay vokatry ny toetr'andro ratsy tokoa. Ny faritry Pingtung no tena voa mafy indrindra satria ny rotsak'orana tany an-toerana nandritra ny 24 ora dia nahatratra1.403mm. Tafakatra hatramin'ny 2.500mm izany rotsak'orana izany tao anatin'ny 3 andro, ary io fatra io dia mitovy amin'ny rotsak'orana mandritra ny herintaona!

Difotry ny rano ny 2/3 n'i Pingtung. Any Linbian, Fangiliao ary Kanding dia tranobe maro no difotry ny rano ary voatery mipetraka eny an-tafontrano ny olona miandry fanampiana. Tany Chiandung kosa dia voatery nafindra toerana ny mponina rehetra.

Araka ny notaterina tao amin'ny vaovao tamin'ny 22:00 ny 10 aogositra lasa teo dia nahafatesana olona 23 ny tondra-drano ary 56 no tsy hita popoka. Maherin'ny 30 000 kosa ny olona tsy afaka mihetsika fa voadidin'ny rano.

Sary nalain'i Liu.

Mampahatsiahy ny “tondra-drano tamin'ny 87 ” tamin'ny taona 1959 ity rivo-doza ity(misy resaka taona sinoa angamba ao: naotin'ny mpanao fanitsiana) , rivo-doza izay namotika tanàna 13. nahatratra 11%n'ny harin-karena tany Taiwan no potika tamin'izany.

Lalam-by tapaka tany Taimali, Taitung

Sary nalain'i CNA(notsongaina tao amin'ny UDN)

Manoloana ny fahasimban-javatra nateraky ny rivo-doza dia nanapa-kevitra handray andraikitra ireo mponina sy ireo mpitoraka bilaogy.

Manangona sy manaparitaka vaovao eran'i Taiwan i Billypan sy ireo mpilatsaka an-tsitrapo ao amin'ny plurk ka nametraka ny Google Map hanamarihany ireo faritra voakasiky ny loza.

Milaza ao amin'ny Plurk i Billypan:

“Arakaraky ny fanampiana sarintany ao amin'ireo sarintany voakasiky ny loza no hahatsapako fa mihasarotra ny toe-draharaha any Changhwa sy Taichung. Tsara fiomanana kosa ny mponina tao afovoan'i Taiwan.”

Namorona vohikala ihany koa i XDite , “Supporting for the victims of Morakot Typhoon“ (fanampiana ireo niharan-doza tamin'ny rivo-doza Morakot), ka miantso ny rehetra hifanampy sy hifanome tanana.

Hafatra tao amin'nyTwitter sy plurk nataon'ny GENE sy ny landslides map nataon'i Schee no nananganana ny Morakot Disaster Intelligence Center, fikambanana hafa najoron'nyADCT, fikambanana mpamonjy voina tsy ara-barotra (tsy maka tombony) sady mahampikambana ahy rahateo. Indro ny rohy hidirana ao amin'ny vohikala.

Afisy kely tondra-drano ao Taiwan: “Momba an'i Taiwan i Andriamanitra”(天佑台灣)

Mizara vaovao maro mikasika ity loza ity koa i Ivan mpitoraka bilaogy. Miantso ny mponina rehetra handefa rano amin'ny tavoahangy ho any amin'ireo faritra voa mafy izy. Manoro hevitra ny solotenam-panjakana Yuan amin'ny tokony hianatra amin'ny Web 2.0 momba ny asa famonjena voina ataony koa i Vincent Chang.

Nahitan'i Lezomà hevitra ny nataon'i Billypan sy Xdite mikasika ny tondra-drano, mijery ny fomba hanomezana endrika indray ny tanàna amin'ny fampiasana ny teknolojia nomerika. Mpanao gazety sy mpitoraka bilaogy antsoina hoe Chyng no nanoratra ao amin'ny fanadihadihana nataony mikasika ny vokatry ny fiovan'ny toetr'andro any amin'ity nosy tropikaly ity. Nofaranany tamin'ny tenin'ilay mpandala ny tontolo iainana Liao Ben-Chuan ny fanadihadihany:

但廖本全指出，全球氣候變遷影響下，暴雨只會愈來愈多；研究也顯示暴雨對島嶼影響最大，若政府沒有長遠國土復育思維，台灣未來堪慮。

Emin Milli, iray amin'ireo tanora roa  sady mafana fo avy amin'ny firaisamonin'olon-tsotra voadaroka mafy sy notanana an-trano maizina roa volana noho ny hooliganism tany Baku tamin'ny herinandro lasa teo, no nandefa hafatra tamin'ny alalan'ny tweet tamin'ny 24 Jona. Tsy vitan'ny hoe ity no hafatra farany nalefany talohan'ny nisamborana azy, fa sady mbola manohina ny fo ihany koa.

“Qurbansız azadlıq olmaz. Ona görə də bu gün mən və mənim kimi adamlar həbs olunmalıdır.” Əbülfəz Elçibəy, 1974

‘Tsy misy fahalalahana tsy misy sorona. Izany no antony, izaho sy ireo olona toa ahy, tsy maintsy samborina.' Abulfaz Elchibey, 1974.

Ity fitantarana ity dia fehezan-teny notenenin'ny filoham-pirenenan'i Azerbaijan taloha Abulfaz Elchibey izay voasambotra noho ny asa fanoherany nandritra ny vaninandro Sovietika. Ny andro nandefasan'i Emin an'io tweet io no tsingerin-taona faha-71 an'i Elchibey.

Mpitoraka blaogy roa avy amin'ny lafin-tany arabo roa samihafa no mikamenona amin'ny zavatra iainan'ireo arabo, manomboka any amin'ny Ranomasimbe ka hatrany amin'ny Gôlfa . Ny iray manontany hoe mandra-pahoviana isika no hipetraka ho mpitazana fotsiny foana raha ny firenen-kafa kosa miezaka mampanaraka ny teotr'andro sy  mampivoatra ny tahirim-pitaovam-piadiana eo am-pelatanany  - ary ny iray hafa indray manao hoe nahoana i Arabia Saodita no tsy mba manana ny tetikasany manokana momba ny any ambony tsy taka-maso any

Bilad Talisman [Ar] mpitoraka blaogy Algeriana  iray no  manontany tena  hoe nahoana ny Arabo no mpitazam-potsiny amin'ny adin'ny balafomanga mahataka-davitra [missiles”]  misy ankehitriny:

Avy any Arabia Saodita, i American Bedu, Amerikana vavy manambady Saodiana, dia manontany hoe nahoana i Arabia Saodita no tsy mba nirotsaka tamin'ny tetikasany manokana  momba ny habakabaka:

Lasa saina aho hoe nahoana no firenena manan-karena toa an'i Arabia Saodita no tsy misafidy hanana ny tetikasany  manokana momba ny habakabaka, toy izay hiankin-doha lava sy hanao fifanarahana amin'ireo mpiara-dia? Hatramin'ny anio, Saodiana tokana monja no mba nandeha tany an'habakabaka tany, Sultan bin Salman bin Abdulaziz al Saud.

[…]

Raha izany,  nahoana hoy  ianao i Arabia  Saodita,  na eo aza ireo harem-beny ny fahaiza-manaony,  no mifidy tsy hanana  tetikasa  manokana momba ny habakabaka ho azy manokana? Nanontany Saodiana iray aho momba ity zavatra ity. Toy izao no navaliny  “Ny mitondra fiara eny an-dalam-be aza mbola tsy hain'ny Saodiana maro, ka fomba ahoana no hieritreretanao hivezivezeny any ambony tsy taka-maso any?” ( mazava loatra fa tamin'ny fomba niharo vazivazy no nilazana izany saingy mampisaina kosa…)

Ity andron'ny mpifankatia (14 Febroary) dia manamarika, tsy ny fiantombohan'ny fanentanana eto amin'ny  Global Voices fotsiny ihany miantso ny olona mba “hampianatra ireo Olona Tiany hampiasa Blaogy na hampiasa ny  Micro-Blog,” fa ao koa ireo ainga maro samihafa mikasika ny hetsika ara-pahasalamana mitodika mankany amin'ny VIH/SIDA mba ho fandrisihana ireo olona maro tratry ny aretina na miaina miaraka amin'izany mba hampiasa blaogy.

Maherin'ny 33 tapitrisa ny olona miaina mitondra ny otrikaretina VIH/SIDA, ary raha kely indrindra dia  2 tapitrisa no efa matin'ny SIDA tamin'iny taona lasa iny. Samy nametraka tantara momba ireo antontan'isa ireo daholo ireo mpitoraka blaogy eran-tany,  toy ny hoe, mizara fijoroana vavaolombelona amin'izany hoe miaina miaraka amin'ny aretina izany, ny fandraisana an-tànana ny fikarakarana olona mitondra VIH/SIDA, sy ny zavatra niainana manoloana ny fanavakavahana sy ny fanamelohana imason'ny fiaraha-monina. Ireny blaogy ireny dia nanampy tamin'ny fanangonam-baovao mivantana momba ny donan'ny aretina amin'ny ankapobeny.

Santionan'ireo resaka miainga mikasika ny fitorahana blaogy manodidina ny olan'ny VIH/SIDA, Global Voices sy  Rising Voices dia hampiantrano ny resaka mivantana amin'ny alalan'ny aterineto  “Fitorahana blaogy amin'ny tokony ho izy” ho an'ireo mpitoraka blaogy sy mafana fo ny andron'ny 27  Febroary 2009.  Handridra ny fifanakalozan-kevitra ireo mpitoraka blaogy Keniana Serina Kalande sy Daudi Were. Asaina daholo ny rehetra.

Ora ao an-toerana: New York 09:00 | Buenos Aires 12:00 | London 14:00 | Johannesburg, Beirut 16:00 | Nairobi, Moscow 17:00 | New Delhi 19:30 | Hong Kong 22:00 | Tokyo 23:00

Efitra hifampiresahana: http://www.worknets.org/chat/. Fomba fidirana mampiasa ny anaranao ka avy eo mifidy ny efitra tianao ho tsidihana amin'ny alalan'ny fanindrianao ny ‘enter' ‘midira'. Rehefa tonga ao amin'ny efitra, fidio ery amin'ny sisin'ny fafana [écran]  havia ery  ny loko hataonao dia mandraisa anjara amin'ny resadresaka.

Famaritana ara-jeograpfia ireo Feo
Misy Sarintany Google azo asisika momba ny mpitoraka blaogy voamarina fa mitondra ny otrikaretina VIH sy ireo mpandray an-tànana ihany koa napetraky Global Voices, ary ireo loharanom-baovaon'olon-tsotra mivoy ny VIH/SIDA tamin'iny Desambra lasa iny ho toy ny singa amin'ny  Andro maneran-tany iadiana amin'ny SIDA. Ilay sarintany, izay miova manaraka ny fivoaran'ny tantara hatrany, dia mampivoitra ireo olona be herimpo izay efa nitoraka blaogy sahady manodidina ity aretina ity. Iray amin'ireny mpitoraka blaogy ireny i  Maureen Akinyi ao Nakuru, Kenya. Milaza izy fa ny fanafenana anarana rehefa mitoraka blaogy nefa misy VIH/SIDA dia tsy manampy mihitsy ho fampihenana ny fanavakavahana ny tratry ny aretina, ary ilaina ny olona mba hitoraka blaogy amin'ny tokony ho izy tsy amin-tahotra. Ao anatin'ity hafatra ity dia ambarany fa na ny fandraisana anjara amin'ny fifaninanana hatsaram-bika aza dia afaka manampy hiadiana amin'ny fanamelohana ireo mitondra VIH:

“Isan'izay nandray anjara tamin'ny fifaninanana Mr sy Miss Red Ribbon 2008 tao amin'ny  Hotely Bontana Nakuru aho; tsy vao voalohany tamiko io raha resaka fifaninanana. Efa nifaninana aho hatramin'ny taona 2006 ary dia nankafy ny tsirairay tamin'ireny fotoana ireny noho ny antony tokana monja, ny fihenana hita mivaingana amin'ny fanamelohana sy ny fanavakavahana. Ny Mr. sy Miss Red Ribbon dia mitondra ireo voan'ny aretina na mitondra ny otrikaretina hankalaza ny hatsarana amin'ny fomba miavaka. Mandritry ny seho dia ny hatsaran'ireo mpilatro no nankalazain'ny olona fa tsy ilay nitondra otrikaretina na ilay voa'ny aretina.”

I ukguy dia monina any United Kingdom ary niaina niaraka tamin'ny VIH hatrany amin'ny taona 1980. Nanoratra momba ny zavatra niainany amin'ny maha dyslexic azy izy, mitondra ny otrikaretinaVIH, ” gay” ao amin'ny blaoginy The ramblings. Ao anatin'ity hafatra vao haingana ity no ilazany fa nanahirana azy fatratra ny nitondra ny aretin'andoha sy ny areti-masony tany amin'ny dokotera.

“Raha vao niala ny faritry ny toeram-pitsaboana aho dia nahatsapa fa tsy nahafa-po ahy velively ilay valina fizahana. Mazava loatra, fa faly aho hoe tsy nahitana soritr'aretina. Nefa koa dia toa nampiasa saina amin-javatra tsy misy dikany aho, hoy aho. Matetika aho no nisaina fa tsy misy mandray ny ahiahiko [adintsaiko] amin'ny saina matotra ny rehetra, Mahafinaritra be ilay dokotera mitsabo ny aretiko VIH ary fantatro fa tena manara-maso akaiky ny fahasalamako izy.

Angamba miankina amiko io, angamba izaho irery koa ve no mila miandrin-tena?

Heveriko fa tsy hoe rehefa ela velona ianao nefa misy VIH, dia midika izany fa hoe tsy nivaky loha momba izany ianao.”

Pinoy Poz, izay any Philippines no monina, dia nilaza manodidina ny maha “gay” hatramin'ny faha 21 taonany, saingy sivy taona taty aoriana dia  “niverina an-dakazery” rehefa nahalala fa mitondra ny otrikaretina VIH. Na eo aza izany, ambarany ao amin'ity  hafany ity ny fahatsapany fa isan'izay tsara vintana izy.

“Niaraka tamin'ny fankalazan'ny Sinoa ny taombaovao tamin'ny Taonan'ny Omby, niventy ny resaka vintany ny olona rehetra. Ary tanatin'ny zavatra rehetra dia tsikaritro ankehitriny fa ny taona 2009 dia nitondra vintana ho ahy, satria teraka tamin'ny Taonan'ny Soavaly. Saingy nino aho fa nanomboka tamin'iny taona lasa iny izany hatsaram-bintako izany rehefa hitako fa nitondra ny otrikaretina VIH aho.

Lazaiko anareo fa nihevitra ny tenako ho olona tsara vintana foana aho na eo aza ny maha olona mitondra otrikaretina VIH ahy amin'izao fotoana izao. Tsara vintana aho satria tsy aretina iray tena mahaosa ahy no mahazo ahy. Tsara vintana aho satria hita ara-potoana hoe mitondra azy aho, ary tsy mbola nahitana soritr'aretina nivoaka. Tsara vintana aho satria manana taha-na  CD4 ambany dia ambany aty ampiandohana. Tsara vintana fa afaka mianoka ny fanamby amin'ny fanombohana mampiasa ny ARV [antiretroviral]. Tsara vintana fa nanao safidy ho amin'ny toerana misy ahy amin'izao fotoana. Tsara vintana aho nifanena tamin'olona maro be nandritry ny andro natao ho an'ny VIH.”

Ireo dia santionany amin'ireo feo maro miakatra ao amin'ny sarintanin'ny Fitorahana blaogy amin'ny tokony ho izy [Blogging Positively map]. Mba ho fandrisihana ireo olona sasany hizara ny tantarany miaina miaraka amin'ny VIH/SIDA,  Global Voices dia namorona ny  “Torolàlan'ny Fitorahana Blaogy amin'ny tokony ho izy [Blogging Positively Guide],” izay ahitana toro-hevitra maro momba ny hoe ahoana ny hampiasàna ny blaogy hiresahana ny VIH/SIDA. Miandrandra toto-tànana izahay amin'ny fandrafetana ilay toro-làlana sy/na hahafahana mahazo tamberina, noho izany ireo rehetra liana na efa mampiasa ny blaogy manodidina ity aretina ity dia entanina mba handray anjara, indrindra indrindra fa ireo izay mitondra ny aretina, na ny otrikaretina VIH/SIDA. Miangavy, mifandraisa  amiko na Janet Feldman raha mila fanazavana misimisy kokoa momba ny Torolàlan'ny Fitorahana Blaogy amin'ny tokony ho izy [ Blogging Positively Guide] , ny resaka mivantana [chat], na ny sarintany.