Faritra maromaro any Metro Manila sy ireo faritany manodidina no mbola tratry ny tondra-drano androany na dia efa nandao ny firenena aza ilay rivodoza tropikaly ‘Ondoy’ (Anarana iraisam-pirenena: Ketsana). Teo amin'ny 200 teo no maty ary an'hetsiny maro ireo nifindra monina tamin'ny nandalovan'ity rivodoza ity tao amin'ny renivohitra ny Sabotsy lasa teo.

Ny orana nivatravatra dia niteraka ny tondra-drano ratsy indrindra teo amin'ny tantaran'ity firenena ity. Nitondra orana betsaka lavitra noho i Hurricane Katrina aza ity rivodoza ity:

RT @wizkitabet: ZAV-MISY: rotsak'oran'i Hurricane Katrina =380 mm tany Louisiana. Rotsak'oran'ny rivodoza Ondoy = 410 mm tany Manila, Filipina.

Ireo vohikalana media ara-tsosialy dia nohamafisina mba hampahafantatra ireo mpamonjy voina momba ny toerana misy ireo tra-boina. Noforonina ny 'situation map'-n'ny rivo-doza Ondoy mba hanangonana vaovao momba ny zavatra ilain'ireo tra-boina. Google dia namorona pejy manokana mba hanangonana fanampiana. Ondoy Relief Efforts dia manana lisitra mazava amin'ny antsipirian”ireo fifandraisana amin'ny mpamonjy voina eny an-kianja, toeram-panaovana fanampiana, ary ireo ekipa mpamonjy voinan'ny governemanta.

Sarin'i Ali Figueroa

Nampiakarina tamin'ny aterineto ireo horonantsary nalain'ireo mponina, izay mampiseho ny fahavoazana mampitahotra vokatry ny tondra-drano. Ity misy horonantsary avy amin'ilay mpampiasa Youtube, didipusrex

Afaka naka horonantsarin'ny tondra-drano nateraky ny rivodoza Ondoy i Mamanay talohan'ny tsy maintsy nitsoahan-dry zareo tany amin'ny rihana faharoa noho ny fiakaran'ny rano. Tsy afa-nihetsika tao amin'ny rihana faharoa ry zareo, ny rano hatreny an-tratra, raha tsy nidina ny rano ny ampitson'iny.

Ity horonantsary ity dia mampiseho mpandalo tsy afa-nihetsika tao anatina fiara raha nahery ny tondra-drano teny ivelan'ny tobim-pitsaboan'i Manila

Ny tanànan'i Marikina, any atsinanan'i Manila, dia ravaravan'ny tondra-drano tanteraka

Ireo mpandeha an-tongotra, ary na ireo mpitondra moto any an-tanànan'i Paranaque, atsimon'i Manila, aza dia mampiasa bonezy [Fanamarihan'ny mpandika = ilay zavatra fotsifotsy hita rehefa mividy fitaovana vaovao toy ny vata fampangatsiahana, na fahitalavitra no lazaiana amian'io 'styrofoam' io ] mba hiampitàna ny arabe

Lasan'ny rano mahery ireo fiara

Ny faritanin'i Bulacan koa, avaratr'i Manila, dia voadona mafy noho ilay rivodoza

Techpinas dia misaotra ny toby fampielezampeo iray tamin'ny fanokanany ny fandaharany mba hanomezana fanampim-baovao amin'ny fotoanany ho an'ireo mpihaino momba ilay rivodoza. Maro amin'ireo mpihainony no niharan-doza tamin'ity rivodoza ity, izay miankina amin'ny fampielezampeo amin'ny findainy amin'ny fanampim-baovao momba ny vonjy voina:

Eo afovoan'ny tsy fahazoana antoka sy fijaliana entin'i Ondoy sy ny tsy fahampian'ny herinaratra any amin'ny faritra maro any Mega Manila, i DJ Gang, DJ Lambert ary DJ Steph dia nanolotra maimaim-poana ny fotoanan-dry zareo amin'ny fanomezana antoka fa ireo mpampiasa finday – indrindra indrindra ireo tafahitsoka any amin'ireo faritra niharan-doza, izay tsy manana fangalam-baovao afa-tsy ny fampielezampeo amin'ny findain-dry zareo efa ho faty– dia mahazo fanampim-baovao momba ny fizotry ny asa famonjena sy velonin'ny fanapariahan'ny Jam 88.3 fanantenana mafy orina sy matihanina. Novàn-dry zareo ho loharanom-baovao momba ny famonjena sy  fandaminana ny filatsahana an-tsitrapo ilay endrika toby fampielezampeo tsy mpivaky loha mahazatra teo.

Nampiasaina ny SMS ho  fampahafantarana an'ireo tra-boina ny fomba hitazonana aina.

Ny tena nampihetsi-po dia ny fandraisan'ireo mpihaino anjara amin'ny ezaka ataon'ny Jam. Nisy ireo niantso ny fampielezampeo mba hanome fanampim-baovao momba ny toetoetry ny fivezivezena any amin'ny  metro. Ireo mpitsabo dia nandefa SMS ireo torohevitra momba ny fisorohana ny fihenan'ny maripàna anatin'ny vatana ho an'ireo tafahitsoka eny ambony tafon'ny tranon-dry zareo voatelin'ny rano, raha mizara ny fomba fikarakarana ‘iray sy valo' ['oral rehydration solution'] kosa ny mpilatsaka an-tsitrapo taloha ao amin'ny Vokovoko Mena

Sarin'i Celina Ann Natanauan Chan

Twitter dia loharanom-baovao azo antoka momba ilay loza sy hanarahana ireo ezaka famonjena. Amin'ny alalan'ny Twitter, afaka mitatitra ny toe-draharaha any amin'ireo faritra lavitra ireo mpampiasa aterineto

ageofbrillig: RT: nandeha tany Payatas ny iray amin'ireo tompon'andraikitra ao aminay omaly. Dami na daw faty. Tsy misy firaharahian'ny media any. Ary tsy dia misy fanampiana.

Cocoy: RT @mlq3 @jeyaiy Ny hany mba fantatro dia ny toe-javatra any Candaba. Any anaty rano ny tanàna iray manontolo, ankoatran'ny fiangonana. Tsy afaka mandao ny tanàna akory..

jovefrancisco: Saika nandritra ny Sabotsy manontolo, nieritreritra aho fa ny fiaraha-moniko no tena voadona mafy indrindra, talohan'ny nahitako ireo sary tamin'ny fahitalavitra

Ireo tweets dia manome torohevitra ho an'ireo ekipa mpamonjy voina sy manampahefana amin'ny toerana hanaterana sakafo.

alexderossi: RT @momma_erin REPOST: Rosario Pasig & Cavite dia TSY nahazo fanampiana ara-tsakafo mihitsy. Raha afaka ianareo dia mba vahao izany olana izany! - salamat po!!

maxenemagalona: GRABE. RT @kitel_anne  Ilaina ny mpitandro filaminana  any an-tanànan'i Marikina. Feno mpangalatra miezaka ny mamaky trano eny rehetra eny.

Ireo tweets dia mampatsiahy ny vahoaka momba ny fizotry ny ezaka famonjena

ANDREWdecastro: Amin'ny fomba ahoana no handrahoan'ireo tra-boina ireo pâtes instantanées ireo? Na hanokafany ireo zavatra am-bifotsy ireo? Mba miteny fotsiny aho

philredcross: Sahirana amin'ny fanohanana ny tanora amin'ny Asa Fanavotana ataonay izahay. Ireo mpilatsaka an-tsitrapo liana dia afaka manatona ny PNRC NHQ (akaikin'ny Anda Circle

cocoy: RT @dementia: Iee, mba manomeza sakafo tonga-dia-vonona sy rano azafady. Tsy manana n'inon'inona handrahoana pâtes ireo tra-boina

Ity tweet avy amina loholon'ny repoblika ity dia mampiseho fa tratr'ity tondra-drano ity daholo na ny manan-karena na ny mahantra:

SayChiz: Monina any sinco hermanos ireo rafozako. Ny tafon-dry zareo sisa no tsy difotry ny rano. Nitady fialofana tany amin'ny trano manana rihana roa mpiray vodirindrina aminy ry zareo

Sarin'i Diane Lorenzana

Andro vitsivitsy lasa izay no nifarana niaraka tamin'ny famonoana ny mpitarika ny LTTE Velupillai Prabhakaran ny ady an-trano naharitra 25 taona nifanaovan'ny governemanta Srilankey tamin'ny Tigra Mpanafaka an'i Tamoul Eelam (LTTE). Mampanontany tena ihany na dia izany aza hoe “Ho faty miaraka aminy ihany koa ve ny nofinofin'ny tamouls hanana firenena manokana tsy misy fanavakavahana?” Na dia ambara ho mpamono vahoaka sy mpampihorohoro aza manko i Prabhakaran dia maro kosa ny manandratra azy mpiady ho amin'ny fahafahany ary ny sasany aza moa dia mandà ny fahafatesany hatrany. Maro ny petra-kevitra miposaka manao izay hampisalasalàna ny fahafatesan'i Prabhakaran ary ny sasany aza dia manambotra sary amin'ny Photoshop mihitsy hanaoporofoana fa mbola velona izy.

Heniky ny fanadihadiana sy ny mifanohitra amin'ny fanadihadian'ny hafa ny tontolom-bolongana Srilankey misara-kevitra.

Na dia nahomby aza ny governemanta Srilankey tamin'ny famaranana ny ady nifanaovana tamin'ny fiokoan'ny LTTE, dia mampiady hevitra sy nahazoana tsikera maro kosa ny fomba nanaovany azy. In Mutiny ohatra namoaka lahatsoratra avy amin'ny Time izay mandahatra ny paikan'i Rajapakse namaliana ny fiokoana.

Serendipity indray nitsikeera ny fampahalalam-baovao tandrefana tsy nampiseho ny fahafalian'ny Srilankey maro sy nankalaza fandrenesana ny vaovaon'ny fiafaran'ity ady mangidy ity. Ampangain'ny mpamaham-bolongana ny fampahalalam-baovao tandrefana nanasongadina izay manaitaitra fotsiny amin'izay soratany ka manentana ny tontolom-bolongana Srilankey izy hampifandanja kokoa amin'ny alalan'ny feony izao fitongilanana izao.

Hamaliana ny vaovao andrenesana ny vondrona Eoropeana mitady ny hananganana tribonaly hanadihady ny fahafatesan'olo-tsotra nataon'ny miaramila Srilankey sy ny LTTE moa dia nihantsy izao tontolo izao ny The Whackster's Lair ho avy any Sri Lanka hahita imaso mivantana izany lazaina fa famonoan'olona izany. Na izany aza dia misy ihany tsitaitaikana mpitolona Tamouls nalaina an-keriny taterin'ny haino aman-jery.

Ho fitsikerana ny fandrarana ny mpanao gazety vahiny sy mpamonjy voina dia nosoratan'ilay mpanao gazety malaza John Pilger fa tsy voarain'izao tontolo izao intsony ny fitarainan'ny Tamouls ary re mihitsy ny feon'ireo Tamouls an-tany lavitra. Teo ho eo moa dia tsikaritray fa nihalefy ny feon'ny mpanohana ny Tamouls noho ny fampitahorana sy ny tahotra.

Sujai ao amin'ny Desicritics dia tsy mpanohana ny LTTE fa manohana ny hetahetan'ny Tamoul SriLankey hanangana firenena manokana ao amin'ny nosy ary manontany hoe:

“Can we ignore the history of how Tamils were targeted, discriminated, and marginalized in Sri Lanka? Does Sri Lanka have a prior record which suggests they are going welcome Tamils participation in that country? Can a Tamil become President of Sri Lanka the way a Sikh can become Prime Minister of India?”

Fihetsiketseham-panoherana Tamoul any Londres, sary Flickr avy amin'i danie, fahazoan-dalana CC license

Musings from Toronto no manontany ny fahohanan'ny Diaspora ny LTTE:

I don't understand why they support the LTTE. [..] I don't understand how they claim the LTTE is any better than the government of Sri Lanka.

Saingy diso kosa ny eritreritra fa manohana ny LTTE avokoa ny Tamouls rehetra. Amardeep ao amin'ny Sepia Mutiny ohatra namoaka lahatsarin'ny mpanao gazety Tamoul Kanadiana Ignatius Sellah miresaka ny fomba fijeriny hafa ao amin'ny CBC, ilazany fa nahetsiketsiky ny sampan'ny LTTE any Kanadà ity hetsikesika fanoherana ataon'ny Tamoul any Kanadà ity.

Ampiasain'ny LTTE tafahoatra ny teny tahaka ny “Genocide” (fandripaham-bahoaka) izay lasa manakona ny tena olana. Nilanjana ao amin'ny Sepia Mutiny no mitsonga ny fanosihosena ny zon'olombelona ataon'ny roa tonta dia ny Governemanta SriLankey sy ny LTTE ka nanoratra hoe:

Terms like “genocide” (and “terrorism,” for that matter) raise our blood pressure and focus our attention on those who have committed violence, but they don’t even begin to address how minorities can be more effectively represented and fairly treated in the future.

Indrajit Samarajiva ao amin'ny Indi.ca indray miteny amin'ny Sri Lankey ampielezana:

It is not enough to lobby the UN or the ‘international community’ or the consciences of the fashionable thinkers of the global elite. [..]

To change Sri Lanka you need to reach the kid in the IDP camp, you need to work with the police office in Hambantota. You need to chat with the Muslims in Galle and the tea pluckers in Nuwara Eliya. [..]

Sri Lanka still needs its bright children to come home.

Gaga amin'ny “fihetsiketsehan'ny tanora avy amin'ny diaspora Tamoul manerantany hanoherana ny fanitsakitsahana ny zon'olombelona ataon'ny governemanta Srilankey” i Gunaratne ao amin'ny Groundviews nefa moa ve ny laharam-pahamehana tsy ny hamaranana hatreo ny ranomodin'ny fankahalana?

Maybe once the conflict is over, they will come back to Sri Lanka to rebuild the country together. However, there is long way to go for reconciliation between the two communities as so much hatred has manifested, especially amongst the Diaspora overseas.

Ny toro-hevitr'i Appu's amin'ny Tamoul dia dia ny mba manandrana manao zavatra hafa indray:

Invest in your people, your lands, your future. You work wonders for your employers in other parts of the World, now do it for yourselves.

To do that however, you need to walk away from the bitterness that you are entitled to feel.

Saingy ahoana moa ny hanifihana ny fangidiam-panahy sy ny fahakiviana raha mbola mitohy ihany ny tatitra isian'ny fanitsakitsahana ny zon'olombelona? Araka ny tatitra farany dia atao an-keriny ny vehivavy ary “nanjavona”ny lehilahy any amin'ny tobin'ny mpifindra monina Srilankey ary voarara tsy mahazo miditra any ny vokovoko mena. Efa manombokamipoitra ihany koa ny valifatin'ny Tamouls. Noho izany mbola mitoetra amin'ireo Tamouls ampielezana ihany ny fahakiviana sy ny tahotra. mampanahy dia mampanahy tokoa ny ho avin'ireo mpialokaloka any amin'ny toby. Aoka ho fantatr'izao tontolo izao ny toe-draharaha handraisany fanapahan-kevitra hampitsaharana ny fanitsakitsahana ny zon'olombelona ary izorana kosa amin'ny karazana fampihavanana.

Rezwan

Ny oram-baratra tamin’ny volana lasa teo dia nahatonga tondra-drano sy fihotsahan-tany tao amin’ny firenena, izay nandrava trano maro misy fianakaviana miisa hatrany amin’ny 200 no mihoatra, nahaverezana tany sy voly antapitrisany tao amin’ny faritra efatry ny firenena. Izany  zava-nitranga izany no nahatonga ny mpiara-monina hiara-mientana hangataka fanampiana ho an’ireo tena tsy manan-katokona sy ireo ravan’ny herisetran’ny natiora.

Napetraky ny ministeran’ny fanajarina ny tany tamin’ny 3 Febroary 2009 ny teti-bolam-bahoaka hamatsiana ny fanampiana ireo tra-boina tamin’ny tondra-drano farany teo. Ny tanjona dia ny hanamora ny fahasahiranana mianjady amin’ireto tra-boina sy hiverenan’izy ireo amin’ny fiainany mahazatra. Satria singa iray ny ezaka fanangonana ireo fanomezana ho amin’ity famatsiana ity, dia narafitra mandritra ny herinandro vitsivitsy ny hetsika malala-tanana mba ho loharanom-bola nasionaly izay entina hamatsiana ireo tra-boina tamin’ny tondra-drano sy ny fihotsahan-tany. Ity no ohatra iray izay mampiseho fa mifanohana ny mpiara-monina ao an-toerana amin’ny alalan’ny fifanampian’izy samy izy ihany. Fiteny Malay ny hoe Masyarakat Perihatin izay midika hoe fiaraha-monina mifampitsinjo.

Ohatra, niezaka mafy ny trano fandraisam-bahiny antsoina hoe Orchid Garden Hotel hitondra ny anjara birikiny amin’ny alalan’ny mofomamy. Nahalafo mofomamy mihoatra ny 2 000 isa ity hotely ity. Tretrika tokoa izy nandranty fonosana mofomamy miisa 25 milanja ho 250kg. Ny hadirin’ireo fonosana rehefa atambatra dia mahatratra ho 84 x 84 santimetatra tora-droa ny velarany ambanty ary  192 santimetra ny haavony (7 pieds  X 7 pieds  X 16 pieds ).

Sarin’ny Strictly Beautiful

Mitatitra mahakasika izay fanomezana mofomamy izay i Ranoadidas ary koa mahakasika loharanom-bola hafa izay nahalafosana tapakila  ahazoana mihinana Nasi Lemak miisa 900, ilay sakafo malaza ao an-toerana:

Nahavita nandafo mofomamy 2000 isa ny fanomezan-tanana mofomamy tao amin’ny Orchid Garden Hotel. Isa lehibe tokoa izany. Nisy ihany koa ny hetsika malala-tanana tao amin’ny D’, toeram-pisotroana kafe sy trano fisakafoanana madinika , koa tao amin’izany no nandafosana tapakila Nasi Lemak miisa 900 (sakafo ao an-toerana vita amin’ny vary andrahoina miaraka amin’ny ronono azo avy amin’ny voanio) sy atody omeleta..

Sarin’ny  Ranoadidas
Nitatitra i AnakBrunei momba ny hetsika malala-tanana baolina kitra izay nahazoana vola mitentina B$ 100 000 avy amin’ny mpijery.

Lalao baolina nisy teo amin’ny DPMM FC sy FFBD XI. Nokarakarain’ny Federasionan’ny Baolina Kitran’ny Brunei ao Darussalam ny lalao. Hatao fanomezana ho amin’ny famatsiana ny tra-boina tamin’ny tondra-drano sy ny fihotsahan’ny tany ny vola rehetra azo tamin’io lalao io (manakaiky ny B$100 ny teti-bola araka ny vaovao azoko).

Ny sary etsy ambony dia mampiseho ny Voninahitra Avo ananany dia ny Satro-boninahitry ny Printsy, Filohan’ny DPMM Football club manome ireo vola voaangona avy tamin’ny hetsika malala-tanana baolina kitra ho eo am-pelatanan’ny filoha mpiandraikitra ny tondra-drano sy ny fihotsahan-tany.

Mampiseho ny fivoatran’ny haintany tao amin’ny faritanin’ny Shandong ny horononantsary YouTube:

Noho ny vokatry ny krizy famatsiam-bola, dia betsaka ireo mpila ravin’ahitra no miverina any aminy any ambanivohitra, hanaratsy misimisy kokoa ny fiainan’izy ireo ny haitany ary hipaka hatrany amin’ny fomba fitondran’ny governemanta ny fampandrosoana ny varotra anaty miady amin’ny krizy. Matahotra mafy ny voka-dratsin’ny haitany i badanjilin, mpitoraka bolongana manana ny tantaram-piaianany teny ambanivohitra:

Lakandrano sy toro-hevitra amin’ny fiaraha-miasa ambanivohitra

Nanome teboka i Pinklady avy amin'ny Tianya forum anisan’ireo feo nivoaka fa kely loatra ny vola nolanian’ny firenena entina hanatsarana misimisy kokoa ny lakandrano tamin’ny fotoana ara-dalana. Mino ny mpitoraka bolongana fa ny vahaolana an-tampony dia ny fanaovana tsifi-drano ny fitarihan-drano:Fa maninona, raha toa ka nisy fiovan’ny toe-karena tao anatin’ny 30 taona, dia mbola tsy nanamboatra ny fitaritan-drano tsifitsifitra foana isika? Tsy sarotra tanterahana akory anie izany e, ny zavatra ilaintsika dia motera mitroka rano ary fantsona PVC fotsiny. Tsy misy ataon’ny governemanta afatsy ny manome ny tohana ara-bola fotsiny ihany dia hatsangana ny firafitry ny fantsona. Ny fanamboarana ny paompy (motera mitroka rano) sy fantsona dia asa tsisy dikany akory.

Krizin’ny tontolo iainana fa tsy hoe akory olana ara-pandrosoana

Kanefa, maneho teboka ny Rivotra anaty Rano (Wind on Water) fa tsy mamaha olana amin’ny tsy fahampianan’ny rano ny vola sy fandrosoana. Betsaka anie ny rano miangona ao ambanin’ny tany e

Faminaniana hafa?

Tamin’ny taona lasa nandritra ny fotom-pankalazana ny lohataona, dia nodarofan’ny tafiotran-dranomandry (tempete de neige) henjana ny faritra atsimon’ny tany Sinoa, avy eo nitohizan’ny horohoron-tany indray, ary amin’ity taona ity dia haintany indray koa. Mahotra ny vahoaka fa mety hisy koa loza hafa handimby. Nisy bolongana mandehandeha ao amin’ny aterneto izay milaza fa mety ho famantarana ny fisian’ny horohorontany misesisesy ity haintany ity. Naka ny dikan’izany ho ao anatin’ny blaoginy i Littlepjy

Oiwan Lam

Nasehon'ny sehatra famahanana madinidnika Twitter indray ny halakin'ny vaovao aely manerantany, ka ny tranga eto dia ny horohorontany 6.2 izay tsapa nanerana an'i Costa Rica iray manontolo, nanana ny ivony tao Vara Blanca, 35 Km miala ny renivohitr'i San Jose. Nivoaka ny trano fiasana avokoa ny olona tao an-drenivohitra sy ny tao amin’ny vohitra mpifanila vody rindrina tao Alajuela sy Heredia tao aorian’ny hotakotaka, toy izany koa ireo polisy nanakana ny arabe tao afovoan-tanàna noho ny ahiahy hianjeran'ny trano efa antitra. Tamin'ny alalan'ny Twitter no ahitantsika ny tatitra voalohany ny horohorontany izay nosoratan’ny @reiterstahl voafehy anaty teny iray ho fahatsapana ny hovitrovitra: HOVITRRRRRA!!!!!. Vetivety dia niely sy nanjaka avy amin’ny Twitter ny marika #cr sy #temblor
Hipoka ny fifandraisana an-telefonina taorian’ny horohorontany, tapaka nandritra ny ora vitsivitsy ny herinaratra tamin’ny faritra maromaro. Voatery niankina tamin’ny loharanom-baovao mirazotra (parallele) toy ny famahanam-bolongana mitantara mivantana CoverItLive izay avelan'ny gazety La Nacion hojerena ny olona, mamaky sy mamaly izay voalazan'ny vohikala.

Loharanom-baovao hafa ihany koa ny an'ny mpanao gazety @amerliarueda izay manana kaonty ao @ Twitter ka mamoaka ny vaovao amina toe-javatra mahatsiravina tahaka itony amin'izay olona mifandray aminy. Ao amin’ny Peace Lodge sy La Paz Waterfall Gardens (zaridainan'ny riandranon'i La Paz water Fall) dia 200 farafahakeliny ny mpiasa sy mpitsidika nihitsoka sy tssy afa-nifandray tamin'ny hafa tao @ La Paz Peace Lodge sy ny zaridainan'i Waterfall (riandrano) izay potika tanteraka araka ny nolazain'ny mpiasa iray nifandray tamin’I Amelia Rueda na dia tsy nisy aza ny aina nafoy. Azonao henoina sy vakiana tsara ireo fanadihadiana momba io horohoron-tany io ao amin’ny blaogin'i Amelia, ary koa ny tatitra farany momba ireo helikoptera tsy miankina naka vola mitentina 3USD $1400 tamin'ireo mpizaha tany mba hamonjena azy ireo hiala ny toerana iharan’ny loza.

@fusildechispas kosa mampahalala aoao antsika ao amin'ny twitter-ny sy ny blaoginy ihany koa, izay mampiandravandra antsika amin'ny alalan'ny horonan-tsary (video) ny fahapotehan'ny tranoiray ao afovoan-tanànan'i San Jose

Ivelan’ny vohitra, akaiky ny tanan’ny Vara Blanca, Poasito, Cinchona sy Fraijanes, dia voalaza fa namoizana tovovavy anankiroa sy fianakaviana iray miisa olona dimy ny fihotsahan'ny tany, ary ahiahiana rehefa miposaka ny masoandro dia ho betsaka ireo faty mety ho hita. Betsaka ny fahasimbana, toy ireo trano mijoalajoala nianjera, ny arabe izay nanjavona noho ny fihotsahan’ny tany ka nety nanototra fiara, fiarakaretsaka ary trano. Nitondra safo-drano ho an’ny renirano ihany koa ny horohoron-tany noho ny fotaka sy ny fako isan-karazany (matiere organique) nivarina tao anatiny. Mbola sarotra ny haminavina ireo fahasimbana avy amin’ny horohoron-tany sy ny safo-drano ary ny fihotsahan’ny tany araka ny filazan'ny vokovoko mena Kostarikana.

Efa nametraka saritany Google mampiseho ireo tatitra momba ny fahasimbana i JaguardelPlatanar . Mba hijerana ny saritany farany, dia tsindrio eto azafady.
Efa natsofok’ireo mpikirakira maro dia maro tao amin’ny YouTube ihany koa ireo horantsary voaray avy amin’ny Televiziona mba hanomezana fampahafantarana ho an’ny hafa izay tsy afaka mahita fantsona (canal) avy ao anatin’ny televiziona izay misy ny toe-javatra taterina.

Voavinaviana fa rahampitso satria mbola ho hita ny fiantraikan'ny voina dia ho betsaka ny fiara sy ny trano ho tsikaritra ny fahapotehany ary ho maro kokoa ny isan'ny niharan-doza fantatra.

Fanampiny:
Nandefa email ho ahy ny Cindy Banks, tompon’ny Peace Lodge sy La Paz Waterfall Gardens, manazava nkokoa ny mombamomba ny trano fandraisam-bahiny mihaja. Tsy simba akory ny trano, nieren-doza ireo biby ary manantena izy ireo fa hiverina amin’ny laoniny sy hihatsara izany afaka volana vitsivitsy. Soa ihany fa tsy nisy aina nafoy tao amin’ny tranom-bahinin’izy ireo ary ny kitro-tongotra folaka no ratra hita hoe ratsy indrindra. Nomarihany ihany koa fa na dia hoe tsara vitana aza izy dia maro ireo fianakaviana no very trano sy havana teo amin’ny mpiray monina ary mametraka zotra ao amin’ny tranokalany izy ireo mikasika ny fanomezana azonao omena ireto fianakaviana tra-boina ireto.

Juliana Rincón Parra

Nivoaka ihany nony farany ny antontan'isan'ny fahapotehana nateraky ny rivodoza Fanele rehefa avy nandalo andro vitsivitsy teto Madagasikara. Nisidina tany amin'iray amin'ny faritra nandalovan'izany rivodoza izany ny filoha Ravalomanana hijery ny haben'ny fahavoazana.

Tadiom-panomezam-baovaon'olo-tsotra

Raha mbola tsy manana vohikala ho azy ny BGNRC (sampan-draharaha misahana ny fikarakarana raha misy ny voina sy ny loza) dia azo jerena ao amin'ny open-source Google map avy amin'ny mpamaham-bolongana roa Marie Sophie Digne sy Tomavana (fr) ny tatitry ny vokatry ny fahavoazana.

Indro misy famintinana ny fahavoazana, araka ny IRIN, amin'ny alalan'ny ReliefWeb:

New figures from Madagascar's National Office for Natural Disasters Preparedness (BNGRC) indicate that cyclone Fanele claimed eight lives and affected some 40,400 people [..] The BNGRC said a further 63,000 people were at risk in Menabe if heavy rain continued to fall. Relief teams are still assessing the damage caused by the two storms, and figures are expected to rise as more information on the full extent of the damage is gathered.

Tadiom-politika

Mirohondrohana noho ny vaovao politika sy ny famoahan-kevitra mifandraika amin'ny famoriam-bahoaka tontosaina androany (24 janoary) sy ny antso hanaovana fitokonam-be mandra-pialan'ny governemanta manontolo ny tontolom-bolongana malagasy.

Maro ny mpamaham-bolongana no mitantara mivantana sy mamoaka sary ny toe-draharaha (misy sary hafa ao amin'ny facebook).

Blogger Ariniaina provides a brief factsheet on the background of the turmoil:

Andry Rajoelina (or Andry TGV) had a TV Station named VIVA and still have a radio station with the same name. The minister of the communication has decided to close the TV station VIVA due to a documentary movie that this station had broadcasted. It was a message from the former President of Madagascar, Didier Ratsiraka [..] Since then, the Mayor ( of Antanarivo, Andry Rajoelina) gave an ultimatum to the government to re-open VIVA TV station before January 13 [..] As Andry didn’t get what he wanted, he invited the people of Tana to go on a strike AGAIN today, January 24.

( sarim-pihetsiketsehana avy amin'i ariniana )

Mpamaham-bolongana Jentilisa no namakafaka lalina ny resaka ataon'ny vondrom-politika roa tonta ary manohitra ny fampielezana ny tsahotsaho tsy voamarina (mg):

Toy izany ihany koa nisy hazo nianjera tao amin'ny kianjan'ny demaokrasia, noho ny fahanterany mazava loatra (tatitra heno tamin'ny radio tana, kidaona maraina) nefa misy manadrohadro hoe “lazao fa sabotazy ihany koa e!”; eo indrindra isika, fambara zavatra amin'ny hafa hatrany ny zavatra toy izany na dia tokony ho tsy misy dikany aza. Eo amin'ny toe-tsaina minomino foana mbola ananan'ny maro dia mbola fampitandremana aloha izay,

Mpamaham-bolongana Avylavitra no mampahatsiahy antsika fa miezaka ny hanakatona ny VIVA radio ny fitondrana nefa tsy mitombina ny anton'izany. Misy ny lalàna tsy manaiky ny hampielezana ny fampielezam-peon'ny tsy miankina manerana ny firenena. Nefa misy ny Radio MBS manohana ny fitondrana efa nampiely ny feony manerana ny firenena nandritra ny 5 taona tsy nahazo fampitandremana akory (mg):

Tsy hoe fanenjehana ny MBS akory no ilazako izany fa filazana kosa hoe ‘Natao ho an’iza ny lalàna?'

( Akanjo Malagasy “yes we can” avy amin'i avylavitra)

Tampodin'ny tantara
Mialisoa Randriamampianina, sady mpamaham-bolongana no mpanao gazety no malahelo mahita indray ny fiverenan'ny tranga tamin'ny 2002, sy ny fahadisoana mitovy hita, fomba fiteny mihantsy ady mitovy ary tsikariny fa mbola lavitry ny fahamatorana ny demaokrasia (fr):

À défaut d’une véritable culture politique, ce grand public se rabat sur la bonne vieille offuscation des éternelles victimes, le ton toujours plus haut, la prudence toujours bradée [..] Ainsi faisait-on en 2002, ainsi fait-on en 2009 [..]: la rue est devenue le chemin forcé, la menace, le recours incontournable. Et au bout, une implosion qui n’est pas forcément utile. Il y a sûrement une juste manière de se faire comprendre, en dehors des intimidations un peu trop faciles et de la condescendance maladroite. En attendant un peu de sang-froid, on en est tous là, en train de naviguer à vue d’œil ou à l’aveuglette. Et on appelle cela « une quête de la démocratie »…

Randy mpamaham-bolongana sady mpanao gazety ihany koa dia manaiky fa mety tsy mbola vonona hanaraka ny tena fanao demaokratika i Madagasikara (fr):

Et c’est bien ce qui inquiète une partie de l’opinion. Car, dans tous les pays du continent qui se sont livrés à ce jeu, c’est toujours par des manifestations d’une spontanéité suspecte que commence la mise en scène.

Tsy noadinoin-dRajiosy ny fikirizana ataon'ny vahoaka nampiakatra azy eo amin'ny fitondrana nefa mandrahondrahona azy kosa ankehitriny (fr):

L’ironie de l’Histoire veut que celui-là même qui a outrepassé l’Etat naguère a eu pour tâche de restaurer l’autorité de cet Etat et de stabiliser ses institutions. Il se retrouve aujourd’hui mis en demeure de conforter cette pérennité. Tâche difficile on l’a vu face à une partie de population versatile.

Tontolon'ny twitter mihamatotra

Fa ny tena mahaliana ihany koa dia ny nisongadinan'ny tontolon'ny twitter izay mandefa ny fioaran'ny toe-draharaha politika toy ny mivantana mihitsy. Afaka manaraka mivantana ny fitantaran'ny tweets ianao amin'ny alalan'ny fampidirana karoka #madagascar: