Horohorontany goavana no nisy tany Padang, Sumatra Andrefana nanodidina ny tamin'ny 5ora hariva (ora teny an-toerana) ny Alarobia teo.

Horonantsary navoakana mpampiasa YouTube iray any Padang:

Niteraka faharavan-trano lehibe sy tra-boina maro ilay horohoron-tany tany ambany ranomasina izay mirefy 7.6 amin'ny maridrefy Richter, indrindra tany amin'ny faritr'i Pariaman, izay morontsiraka any Padang.

Nisy fampitandremana tsunami [id] maneran-tany nalefa ho an'i Indonezia, Thailand, Malaysia, ary India, nefa notsoahana ora iray taty aoriana.

Ilay masoivohom-baovao Indoneziana Antara dia nitatitra fa nahatratra 75 ny isan'ny maty, nefa mety hisondrotra satria mbola misy olona voatototra any ambany vato, ny sasany kosa nifidy ny hijanona eny ivelan'ny tranony [id] sao dia mbola hisy horohorontany.

Araka ny Sekretera voalohany ao amin'ny Foibem-pirenena misahana ny loza voajanahary [National Board for Disaster Management (BNPB)] any Antara, Purnomo Sidik,  tsy nahazo antsipiriany avy amin'ny faritra ny foiben'ny BNPB noho ny faharatsian'ny fifandraisana tany Sumatra Andrefana.

Ny antsasaky ny tanàna no nahitàna fahasimbana ary  naato ireo sidina miditra an'i Padang noho ny fahasimbana'ireo làlam-piaramanidina ao amin'ny seranam-piaramanidin'i  Minangkabau.

Feno hafatra fankaherezana, fanampim-baovao  ho an'ny sy avy amin'ireo tapaka sy namana, ary tatitra momba ny vonjy voina ny tontolon'ny twitter Indoneziana.

henzter: vao nahazo valiny tamin'ny sms-ko, avy amina olom-pantatra any sumbar: mbola mitady ny rahalahiko. *mivavaka*

martimanurung: Hanampy ny Sumatra Andrefana  ny Faritra Atsimo sy Avaratr'i Sumatra amin'ny vonjy voina noho ny horohorontany.

veraalexandra: Andriamanitra o, ampio ireo rahalahy sy rahavavinay any Padang. .omeo hery sy faharetam-po izy ireo..amena.

aditdmid: bru lht dmpak gempa Padang td sore. evakuasi mlm ni trhmbt hjn deras & mati lstrk,75% kota lumpuh. smg para krbn dbri kkuatn&ktabahn. amin.

Ny Filoha Lefitra, Jusuf Kalla, dia nanafohy ny lanonana natokana ho an'ireo solombavambahoaka vaovao ary nandefa minisitra enina hijery ny fahasimbana.

aulia: Nifidy anao izahay. Ny fitakiana ofisialy voalohany ataonay aminao dia ny hanomezanao ny tahirim-bolanao ho an'ireo niharan-doza tamin'ny horohorontany. Mbola mila izany lavitra noho ianao izy ireo.

Tokony amin'ny 11:45 hariva teo (ora teny an-toerana) dia niteny i darlingalih:

darlingalih: RT @isatbb: Jaringan data GPRS ISAT aman terkendali di Padang, anjuran komunikasi ke Padang via fitur BB: Email, BBM, YM, FB. Please RT

Ny minisitry ny fiahiana ara-tsosialy Abu Rizal Bakrie dia niteny fa mety ho goavana tahaka ny niseho tamin'ny horohorontanin'i Yogyakarta tamin'ny 2006 ny fahasimbana ara-foto-drafitr'asa nateraky ny horohorontany farany teo iny.

Faritra maromaro any Metro Manila sy ireo faritany manodidina no mbola tratry ny tondra-drano androany na dia efa nandao ny firenena aza ilay rivodoza tropikaly ‘Ondoy’ (Anarana iraisam-pirenena: Ketsana). Teo amin'ny 200 teo no maty ary an'hetsiny maro ireo nifindra monina tamin'ny nandalovan'ity rivodoza ity tao amin'ny renivohitra ny Sabotsy lasa teo.

Ny orana nivatravatra dia niteraka ny tondra-drano ratsy indrindra teo amin'ny tantaran'ity firenena ity. Nitondra orana betsaka lavitra noho i Hurricane Katrina aza ity rivodoza ity:

RT @wizkitabet: ZAV-MISY: rotsak'oran'i Hurricane Katrina =380 mm tany Louisiana. Rotsak'oran'ny rivodoza Ondoy = 410 mm tany Manila, Filipina.

Ireo vohikalana media ara-tsosialy dia nohamafisina mba hampahafantatra ireo mpamonjy voina momba ny toerana misy ireo tra-boina. Noforonina ny 'situation map'-n'ny rivo-doza Ondoy mba hanangonana vaovao momba ny zavatra ilain'ireo tra-boina. Google dia namorona pejy manokana mba hanangonana fanampiana. Ondoy Relief Efforts dia manana lisitra mazava amin'ny antsipirian”ireo fifandraisana amin'ny mpamonjy voina eny an-kianja, toeram-panaovana fanampiana, ary ireo ekipa mpamonjy voinan'ny governemanta.

Sarin'i Ali Figueroa

Nampiakarina tamin'ny aterineto ireo horonantsary nalain'ireo mponina, izay mampiseho ny fahavoazana mampitahotra vokatry ny tondra-drano. Ity misy horonantsary avy amin'ilay mpampiasa Youtube, didipusrex

Afaka naka horonantsarin'ny tondra-drano nateraky ny rivodoza Ondoy i Mamanay talohan'ny tsy maintsy nitsoahan-dry zareo tany amin'ny rihana faharoa noho ny fiakaran'ny rano. Tsy afa-nihetsika tao amin'ny rihana faharoa ry zareo, ny rano hatreny an-tratra, raha tsy nidina ny rano ny ampitson'iny.

Ity horonantsary ity dia mampiseho mpandalo tsy afa-nihetsika tao anatina fiara raha nahery ny tondra-drano teny ivelan'ny tobim-pitsaboan'i Manila

Ny tanànan'i Marikina, any atsinanan'i Manila, dia ravaravan'ny tondra-drano tanteraka

Ireo mpandeha an-tongotra, ary na ireo mpitondra moto any an-tanànan'i Paranaque, atsimon'i Manila, aza dia mampiasa bonezy [Fanamarihan'ny mpandika = ilay zavatra fotsifotsy hita rehefa mividy fitaovana vaovao toy ny vata fampangatsiahana, na fahitalavitra no lazaiana amian'io 'styrofoam' io ] mba hiampitàna ny arabe

Lasan'ny rano mahery ireo fiara

Ny faritanin'i Bulacan koa, avaratr'i Manila, dia voadona mafy noho ilay rivodoza

Techpinas dia misaotra ny toby fampielezampeo iray tamin'ny fanokanany ny fandaharany mba hanomezana fanampim-baovao amin'ny fotoanany ho an'ireo mpihaino momba ilay rivodoza. Maro amin'ireo mpihainony no niharan-doza tamin'ity rivodoza ity, izay miankina amin'ny fampielezampeo amin'ny findainy amin'ny fanampim-baovao momba ny vonjy voina:

Eo afovoan'ny tsy fahazoana antoka sy fijaliana entin'i Ondoy sy ny tsy fahampian'ny herinaratra any amin'ny faritra maro any Mega Manila, i DJ Gang, DJ Lambert ary DJ Steph dia nanolotra maimaim-poana ny fotoanan-dry zareo amin'ny fanomezana antoka fa ireo mpampiasa finday – indrindra indrindra ireo tafahitsoka any amin'ireo faritra niharan-doza, izay tsy manana fangalam-baovao afa-tsy ny fampielezampeo amin'ny findain-dry zareo efa ho faty– dia mahazo fanampim-baovao momba ny fizotry ny asa famonjena sy velonin'ny fanapariahan'ny Jam 88.3 fanantenana mafy orina sy matihanina. Novàn-dry zareo ho loharanom-baovao momba ny famonjena sy  fandaminana ny filatsahana an-tsitrapo ilay endrika toby fampielezampeo tsy mpivaky loha mahazatra teo.

Nampiasaina ny SMS ho  fampahafantarana an'ireo tra-boina ny fomba hitazonana aina.

Ny tena nampihetsi-po dia ny fandraisan'ireo mpihaino anjara amin'ny ezaka ataon'ny Jam. Nisy ireo niantso ny fampielezampeo mba hanome fanampim-baovao momba ny toetoetry ny fivezivezena any amin'ny  metro. Ireo mpitsabo dia nandefa SMS ireo torohevitra momba ny fisorohana ny fihenan'ny maripàna anatin'ny vatana ho an'ireo tafahitsoka eny ambony tafon'ny tranon-dry zareo voatelin'ny rano, raha mizara ny fomba fikarakarana ‘iray sy valo' ['oral rehydration solution'] kosa ny mpilatsaka an-tsitrapo taloha ao amin'ny Vokovoko Mena

Sarin'i Celina Ann Natanauan Chan

Twitter dia loharanom-baovao azo antoka momba ilay loza sy hanarahana ireo ezaka famonjena. Amin'ny alalan'ny Twitter, afaka mitatitra ny toe-draharaha any amin'ireo faritra lavitra ireo mpampiasa aterineto

ageofbrillig: RT: nandeha tany Payatas ny iray amin'ireo tompon'andraikitra ao aminay omaly. Dami na daw faty. Tsy misy firaharahian'ny media any. Ary tsy dia misy fanampiana.

Cocoy: RT @mlq3 @jeyaiy Ny hany mba fantatro dia ny toe-javatra any Candaba. Any anaty rano ny tanàna iray manontolo, ankoatran'ny fiangonana. Tsy afaka mandao ny tanàna akory..

jovefrancisco: Saika nandritra ny Sabotsy manontolo, nieritreritra aho fa ny fiaraha-moniko no tena voadona mafy indrindra, talohan'ny nahitako ireo sary tamin'ny fahitalavitra

Ireo tweets dia manome torohevitra ho an'ireo ekipa mpamonjy voina sy manampahefana amin'ny toerana hanaterana sakafo.

alexderossi: RT @momma_erin REPOST: Rosario Pasig & Cavite dia TSY nahazo fanampiana ara-tsakafo mihitsy. Raha afaka ianareo dia mba vahao izany olana izany! - salamat po!!

maxenemagalona: GRABE. RT @kitel_anne  Ilaina ny mpitandro filaminana  any an-tanànan'i Marikina. Feno mpangalatra miezaka ny mamaky trano eny rehetra eny.

Ireo tweets dia mampatsiahy ny vahoaka momba ny fizotry ny ezaka famonjena

ANDREWdecastro: Amin'ny fomba ahoana no handrahoan'ireo tra-boina ireo pâtes instantanées ireo? Na hanokafany ireo zavatra am-bifotsy ireo? Mba miteny fotsiny aho

philredcross: Sahirana amin'ny fanohanana ny tanora amin'ny Asa Fanavotana ataonay izahay. Ireo mpilatsaka an-tsitrapo liana dia afaka manatona ny PNRC NHQ (akaikin'ny Anda Circle

cocoy: RT @dementia: Iee, mba manomeza sakafo tonga-dia-vonona sy rano azafady. Tsy manana n'inon'inona handrahoana pâtes ireo tra-boina

Ity tweet avy amina loholon'ny repoblika ity dia mampiseho fa tratr'ity tondra-drano ity daholo na ny manan-karena na ny mahantra:

SayChiz: Monina any sinco hermanos ireo rafozako. Ny tafon-dry zareo sisa no tsy difotry ny rano. Nitady fialofana tany amin'ny trano manana rihana roa mpiray vodirindrina aminy ry zareo

Sarin'i Diane Lorenzana

Faharoa eran-tany i Inde amin'ny firenena be mponina indrindra miaraka amin'ny olona 1.2 lavitrisa ary mipetraka any ambanivohitra ny 70% amin'ireo mponiny. Mihoatra ny Indiana 456 tapitrisa (42% amin'ny mponina) no latsaka ambanin'ny $1.25 isan'andro tsipiky ny fahantrana maneran-tany . Na dia 28% amin'ny GDP isan'andro aza ny sehatry ny fambolena, ampahany betsaka amin'ny olona no ao anatin'ity sehatra ity na izany tantsaha na any amin'ny raharaha hafa. Indrisy anefa fa nisy aretim-be nahazo ny tantsaha Indiana. Nihanahazo vahana tsikelikely teo amin'ny tantsaha ny fandraisana fepetra hentitra toy ny manala ny ainy faobe mba hialana amin'ny tsindry mafin'ny trosa sy ny fahantrana ary nanomboka nitranga tsikelikely izany isan-taona .

Nampahafantatra i Devinder Sharma, mpandalina nyara-tsakafo sy ny politika ara-barotra any Inde ao amin'ny blaogy Ground Reality, hoe:

tantsaha 60 no namono tena ny volana Jolay (2009). Tamin'ny 10Aogositra,16 hafa no nanala ny ainy. Miseho foana izany zava-maha-valalanina  izany any ambanivohitra na dia eo aza ny hamaroan'ny komity, ary manamafy hatrany ny hamaroan'ny famonoan'olona ny fepetra noraisina izay asehon'ny mpanao politika sy ny manam-pahaizana eo an-tanàna. Ny tena loza dia tsy misy olona mirotsaka mijery ny tena antony mahatonga ny tsy fisian'ny fiafaran'ity hirifirin'olombelona ity.

Ary fa maninona no mamono tena ireo tantsaha ireo? Manazava , i Nita J. Kulkarni mpanao gazety mahaleotena ao amin'ny blaoginy Ny fahitana an'i Inde amin'ny zoro lehibe [A Wide Angle View of India]:

Nidi-trosa ny tantsaha noho ny fitambaran'ny fidangan'ny saram-pitrandrahana, ny masomboly hibrida lafo loatra (lazaina fa ahazoana vokatra betsaka) sy ny fanafody famonoana voalavo amidin'ireo orinasa lehibe maneran-tany, sy ny hamoran'ny vokatr'izy ireo, nateraky ny fanafarana entana. Nanampy trotraka ny fahorian'izy ireo ihany koa ny haintany. Lafo loatra ho an'ny tantsaha ny fitarihan-drano nefa ny  governemantam-panjakana tsy manampy.

Mitantara ny tsy fetezan'ny fandrindrana asa vonjytaitran'ny governemanta  ny mpampiasa blaogy Indiana S Gupta .

i Sonia Faleiro, mpanao gazety nahazo loka sady mpanoratra avy any Inde manazava hoe ahoana no naharaikitra ny mpamboly landihazo any amin'ny faritry Vidarbha ao amin'ny fanjakan'i Maharashtra amin'ity honahonan'ny trosa ity rehefa tsy misy fanampiana avy amin'ny fanjakana.

Voly iray tojo aretina ohatra, na hadisoana teo amin'ny fividianana masomboly ratsy dia manosika hindrana vola. Dimy isan-jaton'ny tantsaha ihany no afaka miditra amin'ny fampindramam-bola avy amin'ny kaoperativa sy ny banky, matetika noho ireo antony ireo. Ny ambiny dia tsy maintsy miditra amin'ny mpampanjana-bola tsy miankina, izay matetika mpampindrana masiaka ka maka zanany eo amin'ny Rs 500 isaky ny efa-bolana amin'ny vola Rs 1,000 indramina.

Manomboka tsy zaka intsony ny vesatry ny trosa, mamono tena ny tantsaha raha vao misy tsy fihetezana kely avy amin'ny zava-boahary.

Nanoratra i Vikasho ao amin'ny blaogin'ny Associación Prabhat, fikambanana tsy mitady tombony voarakitra any Espàna sy Inde miasa mba hampiely sy hanampy ny ezaka fampandrosoana ny vondrom-piarahamonina any amin'ireo toerana lavitra andriana any Inde. Tohina izy noho ny tsy fihetsehan'ny governemanta sy ny tsy fahampian'ny firaharahian'ny hafa:

Raha te hamaha ny olan'ny tantsaha ny governemanta, maninona no tsy nomena fanampiana manokana izy ireo tao aorian'ny haintany na ny tondra-drano ( matetika mihitsy any Bihar ). Maninona no lavina ny tantsaha any amin'ny faritra maro amin'ny firenena eny fa na ny zo ara-dalàna hanao findramam-bola amin'ny banky misahana varotra aza… Maninona no tsy msy olona miresaka ny tsy fahampiana ara-tsakafo sy ny hanoanana any amin'ny faritra maro any Inde (mipetraka amina faritra vitsivitsy any Inde ny 25% n'ny  mahantra sy noana eran-tany) ?

Maninona no tsy misy vaovao mikasika ny famonoan-tena misoko miadana eo amin'ny tantsaha izay mitranga matetika any amin'ny faritr'i Inde?

Eritreretiko mihitsy hoe sahirana amin'ny fivoarana ara-toe-karena i Inde  ary te-hiaina fotsiny anaty nofinofy hoe efa manakaiky ny tontolo mivoatra (ary tsy misy izany 25% n'ny mahantra eran-tany izany mipetraka any Inde).

i Harini Calamur ,  mpamokatra horonantsary Indiana, mpampianatra, mpanoratra sady mpitoraka blaogy dia  naneho hoe ahoana no tsy ahalalàn'ny haino aman-jery ny ratran'ny tantsaha mitondra azy ireo any amin'ny famonoan-tena, raha oharina amin'ny hamaroan'ny rako-baovao mahakasika ireo olo-malaza:

Ny andro nitazonana an'i Shahrukh Khan nandritry ny adin'ny roa [..] tantsaha 21 no namono tena tany Andhra Pradesh satria tsy afaka nanefa ny trosany .

Kanefa tsy afaka tohanana ny famonoan-tenan'ireo tantsaha, tsy mampitombo ny TRP izany ary tena tsy fotoanany velively hiatrehana resaka mamaivay ho an'ireo antsointsika hoe ‘mpanao gazety'.

i Himanshu Rai , manampahaizana amin'ny informatika sady mpampiasa blaogy, dia manasongadina ihany koa ny fanatsongatsongan'ny Indiana ny olan-dry zareo:

Nitarika fahabangana lehibe eo amin'ny modelin'ny fivoarana ny fitombon'ny elanelana eo amin'ny sehatra an-tanàn-dehibe sy ny any ambanivohitra. Ny tena mahatsikaiky dia tsy misy olona miraharaha ny mahantra mihitsy na ny filàna fiovana marina.

Ny olona manana fari-piainana antonony, izay latsaky ny 5%n'ny mponina, no mahazo fanrakofana mediatika mihoam-pampana. Ny fampiatoana mpiasa any amin'ny orainasa fitaterana an'habakabaka no mavesa-danja kokoa noho ny famonoan-tena faobe ataon'ny tantsaha eto amin'ny firenentsika

Tatitra farany avy amin'ny Navdanya Trust, vondrona fampielezan-kevitra Indiana, hoe “ maro kokoa amin'izao fotoana izao ny olona noana any Inde noho ny any Afrika Atsimon'i Sahara. Ary ny olona tena faran'izay noana ao dia ny mpamokatra - ny tantsaha”.

Nanohitra ireo tantsaha. Nefa ny hany fitaovan'izy ireo dia ny famonoan-tena. Efa-taona aty aorian'ny haintany, tantsaha 5,000  any amin'ny fanjakan'i Inde ao Jharkhand no nanao sonia ny dinan'ny famonoan-tena ary mitaraina fa tsy nanao dingana iray akory ny governemanta mba hampivoatra ny toe-piainany.

Nanakiana izany ny filozofa Indiana i Vandana Shiva, mafana fo mpiaro tontolo iainana, mpahay toe-karena mpiaro ny vehivavy ary mpanoratra,  amin'ny lafiratsin'ny toe-karena eo amin'ny sehatry ny fambolena sy ny fanatontoloana. Na izany aza, miaraka amin'ny tahan'ny tsy fisian'ny asa mihoatra ny 7% , tsy afaka ny hahita asa mba hivelomana mihitsy ny tantsaha.

Maneho ny ratran'ny tantsaha Indiana ny Mitti, fanadihadiana fohy novokarin'ny mpanao horonantsary tsy matihanina,  Vibhu Mohunta sy  Ashish Dhadade.

Mpanao gazety indiana iray miompana amin'ny fandrosoana iray nahazo ny loka, i P. Sainath tao amin'ny Counterpunch no  maneho fa mirongatra izay tsy izy ny fahantrana sy hanoanana eo anivon'ireo tantsaha Indiana:

Mpividy mivantana ny voan-tsakafo ny tantsaha Indiana an-tapitrisany kely sy madinika. Tsy mahavita mamokatra betsaka ampy hahavelona ny fianakaviany ry zareo ary mila miasa amin'ny tanin'ny hafa sy any an-toeran-kafa mba hamenoana ny banga. Tena tohana mafy amin'ny halafon'ny vidin'ny sakafo izy ireo noho izy ireo tsy maintsy mividy ny masomboly  ilainy eny an-tsena, toy ny niseho tamin'ny 1991, ary indrindra ny tamin'ny voalohandohan'ity taona ity. Tena zava-misy marina ny hanoanana eo anivon'ireo mpamokatra ny sakafo. Fanampin'izany, nidina tsy misy hoatr'izany ny  “masonkarena isam-batan'olona” eo amin'ny voan-tsakafo teo amin'ny tantsaha Indiana vantany vao nanomboka ny “fanovàna” : nanomboka 510 grama isaky ny Indiana tamin'ny 1991, lasa 422 grama tamin'ny 2005. (tsy fatiantoka 88 grama izany. Fatiantoka 88 ampitomboina 365 ary avy eo amin'ny Indiana iray lavitrisa.) Nasongadin'i prof. Utsa Patnaik, manam-pahaizana ara-toe-karena eo amin'ny fambolena fa eo amin'ny latsaky ny 100 kg ny salan'isa isam-pianakaviana mahantra amin'izao fotoana izao raha oharina amin'ny tamin'ny folo taona lasa.

Hitohy hijaly foana ny tantsaha Indiana mahantra raha mbola misy ny tsy fahatomombanana eo amin'ny fitantanana ny rano madio, hoy ny fanazavan'i Suvrata Kher manam-pahaizana momba ny tany. Manampy trotraka ny fahantran'izy ireo ihany koa ny tsy fisian'ny findramam-bola mora sy malalaka toy ny findramam-bola antonony sy ny tsy fisian'ny safidy amin'ny masomboly na ny tranga mety hahazoana tombony. Miraikitra amin'ny kodiaran'ny fahantrana sy ny loza voajanahary toy ny haintany izy ireo izay mandetika azy anaty lozoka. Mihevitra i Sanjeev Sanyal,  mpahay ara-teo-karena sy ara-tontolo iainana,  fa mila mihevitra ifotony ny sehatra ara-pambolena i Inde hampitsaharana an'ireo fahafatesanaireo.

Niteraka adihevitra mafana teo amin'ny tontolon'ny blaogy Pakistane ny fahafatesan'ilay Pakistane iray mpandray anjara tamina seho mivantana. Nandray  anjara tamina fanadinana iray i Saad khan, izay noraketina an-tsary tany Bangkok, ka tao anatin'izany ny filomanosana tanatina renirano sady mitondra vesatra 7kg. Araka ireo izay nanatri-maso, toa nanana olana i Khan ka niantso vonjy nialohan'ny niletehany tany anaty rano.

Tany amin'ny Twitter nalefan'ny naman'i Khan akaiky iray sy mpiara-miasa taminy taloha no tonga voalohany ny tatitra momba ilay fahafatesana , ka niteraka onjam-panehoan-kevitra maro teo amin'ireo tambajotram-bohikala sosialy. Farrukh, naman'i khan, dia niangavy ireo mpitoraka blaogy mba hiray hina ary hangataka fanazavana momba ilay voina nanala ny ain'ilay tovolahy tao amina hafatra iray ao amin'ny Twitter:

@Farrukh ahmed: ho an'ireo mpitoraka blaogy rehetra: ilaina ny fanampianareo amin'ny fanandratam-peo hanohitra ny sehon-dalao mivantana zara raha voarindra notontosain'i Unilever izay namoizanay namana akaiky iray. Mandà ny hanome fanampim-panazavana/horonantsary nalaina tamin'ilay zava-nitranga i Unilever.

Taoriana kely, namoaka lahatsoratra momba ny antsipirian'ilay zava-nitranga i Farrukh tao amin'ny blaoginy:

Ankoatra ny fijoroako vavolombelona manokana, notazon'ireo ‘multinationales' manohana ilay seho ho tsiambaratelo tsara afina  ny fahafatesan'i Saad. Mahatsikaiky anefa fa izany indray no vao maika nampiparitaka ity raharaha ity eran'izao tontolo izao any amin'ireo blaogy sy tambajotram-bohikala sosialy(…) amin'ny alalan'ity lahatsoratra ity, te-hanazava resaka sy hametraka fanontaniana maromaro aho izay azoko antoka fa any an-tsainareo taorian'ny naharenensanareo bebe kokoa momba ny nahafatesan'i Saad.

I Paksatire dia naneho sariitatra mahatsikaiky mitsikera ny andraikitry ny haino aman-jery lehibe tamin'ny tsy fanazavana ny tena zava-nitranga marina. Ny hafatra tiany alefa dia ny hoe voan'ny tsindry hazo lena avy amin'ny vondron'ny mpanohana  ny haino aman-jery lehibe.

sariitatra mahatsikaiky' - mitsikera ny tsy fahampian'ny fanambarana momba an'i Khan

Nandritra izany dia niparitaka tsimoramora teny amin'ny haino aman-jery lehibe ireo vaovao momba ny nahafatesan'i Saad. Dawn dia nitatitra momba ilay fahafatesana tamin'ny alalan'ny fanazavana avy tamin'i Unilever, izay milaza fa tsy misy ifandraisany amin'ny fahafatesan'i Saad  mihitsy. Tao amina lahatsoratra vahiny iray tao amin'ny All things Pakistan, Sabeen Mehmud dia mizara ny zava-niainany momba ny fiaraha-miasa tamin'io vondrona goavana io.

Nisy fisakaizana be mihitsy tao ary nanana fotoana izahay handinihana ireo departemanta rehetra eo am-perinasa , tahaka ny hoe miasa ao.(..) Masinina tsy manam-panahy ny vondrona [Corporation], mirona ho amin'ny fikatsahana tombon-tsoa. Ireo toetoetry ny fomba fijery, ireo torolalana ara-etika [ethical guidelines] ary   ireo andraikitra ara-tsosialin'ny vondrona dia fepetra ara-dalàna izay tsy misy fiatraikany any amin'ny fomba fanaovan'ireo orianasa afera.

Manohy ihany i Sabeen momba ilay fifandraisana, ary miangavy mba haharihary ny zava-marina:

Voalaza aloha ny momba an'iny, manaiky aho fa tao amina tontolo iainana voafehy tsara no nanaovana ilay seho namoizana ny ain'i Saad Khan ary tokony ho azo nosorohana ny loza. Amiko dia toa tranga tena nisy fanaovana an-tsirambina izy ity.

Dr. Awab Alvi ao amin'ny Teeth maestro koa dia namoaka karazan-dahatsoratra maro mifandraika amin'ity loza ity, ka miahiahy ny fisian'ny antsirambina avy amin'ireo tompon'andraikitra. Tao anatin'ny iray tamin'ireo lahatsoratra vao nivoakany dia namoaka resadresaka niaraka tamina mpandray anjara iray izy, izay nanambara fa azo nosorohana iny loza iny, ary nateraky ny antsirambina nataon'ireo mpikarakara.

Max Robinson dia nampitaha ireo seho mivantana amin'ny fahitalavitra maneran-tany. Manasongadina ny tokony handraisan'ireo tompon'andraikitra ao amin'ny televiziona andraikitra amin'ny fampafantarana ireo mpandray anjara ny zavatra mety hitranga amin'ny adina  sasantsasany.

Mbola mijanona ho misitery ireo zava-nitranga tamin'ny nahafatesan'i Khan. Mbola tsilian-dresaka ihany no misy ka noho izany dia tsy misy filazana azo antoka raha tsy mahita porofo mazava. Ao amin'ny blaogiko manokana dia naneho ny tahotro aho momba seho mivantana isan-karazany, izay tontosaina matetika aty Pakistana.

Iny zava-nitranga iny koa dia manokatra varavarana ho an'ny tontolo manjavozavon'ny seho mivantana any Pakistana izay tsy mijery velively ny fepetra fiarovana. [..] Ny fanontaniana mipetraka izao dia mitodika amin'ny fisian'ireny karazana seho fialamboly ireny – tsy mijery akory ny fepetra fiarovana– tokony ho avelantsika hanohy amin'ny anaran'ny fialamboly sy ny varotra ve izy ireo?