Bangladesh: Mampanahy Amin'ny Fahampiana Ara-tSakafo Ny Fihenan'ny Fiankinan-doha Amin'ny Fambolena

Firenena mivelona amin'ny fambolena i Bangladesh. Marobe ireo mponina no miankina amin'ny fambolena ny fivelomany. Ankehitriny, 19.1%-n'ny PIB (Vokatra Ankapobe Anatiny) dia avy amin'ity sehatra ity .

Navoakan'ny fanadihadiana farany teo [bn] fa miha-mijotso ny fiankinan-doha amin'ny fambolena sy ny voka-pambolena ao amin'ny firenena. Nihena ihany koa ny fampiasana olona eo amin'ny sehatry ny fambolena. Nampiseho ny firoboroboan'ny sehatry ny indostria sy ny asa-tanana ny taompolo efatra farany teo, izany no antony voalohany indrindra.

Ankehitriny,eo amin'ny 48%n'ny mponina no miankina amin'ny fambolena. Dimy taona lasa izay, 60% izany. Nihena hatramin'ny 20% ny fampiasana olona eo amin'ny sehatry ny fambolena. Nitombo hatramin'ny 9% ny isan'ny mponina tsy mana-tany, izay mahatratra olona 15 tapitrisa.

 

Fantatra fa firenena mivelona amin'ny fambolena i Bangladesh, na dia izany aza, miha-mihena isan'andro ny fiankinan-doha amin'ny fambolena. Sary tao amin'ny Wikipedia, Balaram Mahalder. CC: BY-NC

Tao anatin'ny taona vitsivitsy izay dia niakatra ny vidim-bokatry ny fambolena. Nanjary niha-lafo ny zezika, ny rano tarihana an-tatatra (irrigation), ny herinaratra ary ny solika ka vokatr'izany, niakatra avokoa ny masonkarenan'ny vokatra. Kanefa tsy dia mahazo tombony firy avy amin'ny voka-pambolena ny mpamboly satria tsy miakatra araka ny tokony izy ny vidim-bokatra. Indraindray ary matiantoka izy ireo. Bilaogera Russel ao amin'ny Amar Blog nanontany ny antony mbola hijanonan'ireo mpamboly amin'ny sehatry ny fambolena :

গত ১ মাসের বাজার দর বিবেচনা করলে দেখা যাচ্ছে গত এক মাসে বাজারে গরুর মাংসের গড় মূল্য ছিলো ২৭০ টাকা, সয়াবিন তেলের গড় মূল্য ছিলো ১৩০ টাকা থেকে ১৪০ টাকা, যে দেশে কৃষককে এক কেজি গরুর মাংস কিনতে আধা মন ধান বেচতে হয় সে দেশের মানুষ যে এখনও কৃষি কাজ করে এটাই আশ্চর্যজনক।

যে দেশে এক কেজি তেল কিনতে গোলা থেকে ৭ কেজি ধান দিতে হয় কৃষককে সে দেশে কৃষকেরা এখনও ধান উৎপাদনের মাহাত্ম্য দেখাচ্ছেন এটাই আশ্চর্যজনক।

Raha oharintsika tamin'ny vidin'entana teny an-tsena tamin'ny volana lasa, ny vidin'ny hen'omby iray kilao amin'ny ankapobeny dia BD Taka 270 ($3.4), ny litatry ny menaka soja kosa BDT 140 ($1.75). Ao amin'ny firenena izay tsy maintsy ivarotan'ireo mpamboly vary akotry 20 kilaograma mba hividianana hen'omby iray kilao dia mahagaga fa mbola afaka mivelona amin'izany ihany ny mpamboly.

Mbola hihamafy hatrany ny fiainam-bahoaka mivelona amin'ny 1 dolara isan'andro  noho ny olàna ara-tsakafo. Sary: Firoz Ahmed. Copyright Demotix (4/8/2012).

Mipetraka ny ahiahy momba ny fahampiana ara-tsakafo noho ny fihenan'ny tany ambolena sy ny fiankinan-doha amin'ny fambolena. Noho ny fihenan'ny fahefa-mividin'ny olona, maro ireo olona no tsy afaka mividy sakafo araka izay ilainy. Maro ny miahiahy fa raha mijanona tsy hiasa amin'ity sehatra ity intsony ireo mpamboly fa hivadika asa hafa, inona no hitranga.

Economic Intelligence Unit, gazetiboky be mpamaky ao Angletera, namoaka ny filaharana ankapoben'ny tsy fahampiana ara-tsakafo, mitàna ny laharana faha-81 i Bangladesh izay manana isa 34,6 amin'ny 100. Azonao an-tsaina amin'izany salan'isa izany ny toetry ny tsy fahampiana ara-tsakafo ao Bangladesh.

Nilaza ny tatitra tamin'ny 2009 avy amin'ny Fandaharan'asa momba ny Sakafo Manerantany (World Food Program = WFP) sy ny Fikambanana misahana ny Sakafo sy ny Fambolena (FAO) fa mponina eo amin'ny 35 tapitrisa ao amin'ity firenena ity no tsy ampy 1805 kaloria isan'andro noho ny tsy fisian-tsakafo sy ny tsy fahampian'ny otrikaina amin'ny sakafo. Araka ny filazan'ny Ivom-pikarohana momba ny Fampandrosoana ao Bangladesh, eo amin'ny 50%n'ny mponina eo no miatrika tsy fananan-kanina indray maka (mandritra ny maitsoahitra ohatra) isan-taona, ary 7% kosa no tsy mahavita misakafo in-telo isan'andro. Ampahefan'ny mponina ihany no misakafo ampy mandritra ny taona.

Etsy andaniny, very fotsiny ny sakafo ao amin'ny firenena noho ny tsy fisian'ny fitehirizana sahaza sy ara-potoana ary ny tsy fahaizana mivarotra. Bilaogera Ek Theke Aat (1 to 8) ao amin'ny Somewhereinblog.net naneho hevitra hoe:

কৃষিতে আধুনিক কলাকৌশল ও সুষ্ঠু কৃষি বিপণন ব্যবস্থা, সংরক্ষণ ও পরিবহনের অভাবে প্রতিবছর প্রায় ২৫-৩০ ভাগ কৃষিপণ্য অপচয় হচ্ছে। আধুনিক কৃষি ব্যবস্থাপনার অভাবে প্রতিবছর যে পরিমাণ কৃষিপণ্য অপচয় হচ্ছে তার আনুমানিক বাজার মূল্য অন্তত ৪ হাজার কোটি টাকা।

Voka-pambolena eo amin'ny 25-30% eo no very noho ny tsy fisian'ny fomba famokarana maoderina, tsy fahaiza-mivarotra, ny tsy fisian'ny fitehirizana sy ny tsy fahaiza-mitantana ny fitaterana. Eo amin'ny 40 miliara taka ( $500 tapitrisa) eo ny fahaverezana noho ny tsy fisian'ny fitantanana maoderina amin'ny fambolena.

Mba hanatsarana ny fahampiana ara-tsakafo, ilaina ny famatsiam-bola bebe kokoa eo amin'ny sehatry ny fambolena. Ilaina ny fambolena mifototra amin'ny indostria ho fampiasana mahomby ireo voka-pambolena. Nandray fepetra ny governemanta ka hanome fampisamboram-bola ho an'ny fambolena mifototra amin'ny indostria sy fanamboarana sompitra. Araka ny tatitra momba ny teti-bola isan-taona avy amin'ny Bankin'i Bangladesh taona 2011-12, nisy fitomboana hatramin'ny 30 milliara Taka ($370 tapitrisa dolara) ny fampisamboram-bola izay nitombo eo amin'ny 24% eo raha oharina tamin'ny taon-dasa.

Atombohy ny resaka

Mpanoratra, azafady Hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.