Betsaka amin'ireo kolontsaina no mampiaraka ny sakafony amin-javatra vita avy amin'ny voamaina; mofo, biskoitra sy karaza-mofo nahandroina tamin'ny entona no tena isan'ny sakafon'ny olna amin'ny toerana maro manerana izao tontolo izao. Androany isika dia hitsidika mpiangaly sy mpahandro mba hijery ny fomba fikarakaran-dry zareo sy fanaovany ny sakafo fanomeny ny fianakaviany.

Voalohany indrindra dia hiato ao Frantsa isika, amin'ny maha-mpanao mofo azy, i Vincent Talleu dia manamboatra ‘croissants’, sokolà sy karazam-bokatra hafa mitovitovy amin'izany amin'ny fampiasana feta iray ihany ho fototra iaingàna:

 

 

Ao India, ny mofo fisaka fanatra amin'ny hoe roti, chapati na parottas dia manaraka foana ny sakafo ka ny fomba fanamboarana azy ity dia mety ho somary mahasarika ihany. Manaraka eo, isika dia mahita vehivavy iray mahandro roti chapatis ao an-dakoziany, manafisaka izany amin'ny alàlan'ilay hazo kiboribory eo ambony hazo fisaka, mahandro azy eo ambony tava iray na lapoaly vy ary avy eo mamarana izany amin'ny fampandalovna azy anaty afo mivantana, izay mampibontsina azy ho toy ny balaonina:

Ireto lahatsary manaraka ireto dia maneho ny fahasamihafan'ny fahaiza-manaon'ny olona amin'ny fanaovana mofo fisaka tsy nasiana lalivay: miainga amin'ny hakingàna sy ny fahafehezana amin'ny fanomanana azy, fampifangaroana ny feta sy fanafisàhana ny chapatis handrahoana ao anaty lafaoro vita biriky ao an-trano ao, mankany amin'ny famokarana betsaka, ahitàna parottas maro misindintsidina eny amin'ny rivotra alohan'ny hametrahana azy eny ambony fatàna:

http://youtu.be/1AbsFDVeQHc

Manerana ny faritra Amerika Afovoany, ny tortilla vita avy amin'ny katsaka no tena sakafo tsotra ho an'ny maro. Ary dia afaka mividy tortillas vao avy noloarana mihitsy ianao, betsaka ny olona no mbola manaraka ny fomba nentin-drazana amin'ny fanamboarana azy ireny. Ao Zacualtipán any Hidalgo, Mexico lakozia iray nandalo taonjato maro no sehatra ho an'ny katsaka sy ny masa, hitotoana azy ambony vato  metate, hamolavolàna ny tortillas haka ny endriny boribory ary handrahoana azy anaty lafaoro kitay:

Ity vehivavy ity izao manafisaka tortillas amin'ny fampiasàna rovitra harona plastika eo ambony latabatra mba hahafahan'ilay tortilla mihodina rehefa volavolaina homena endrika:

Ao Tiorky, ny mofo fisaka be mpisafidy dia ny yufka.  Ity lahatsary manaraka ity dia mampiseho lehilahy iray manodina ny feta ho lasa toy ny taratasy lehibe manify iray

 

Ao Filipina, ny mofo vita avy amin'ny kobam-bary ary nahandroina tamin'ny entona antsoina hoe puto dia nentin-drazana ary azo hanina amin'izao fotsiny na miaraka aminà zava-mamy sy masira:

Eto ny karazany ampiasàna ronono avy amin'ny coco sy kobam-bary:

Ary ity iray ity dia mampiasa lafarinina, ny vokatra azo dia tsy misy hafa amin'ny  “pancake batter” na crepe, saingy izy nahandroina tamin'ny entona fotsiny:

http://youtu.be/eKl10kOahi4

 

Ao Kolombia sy  Venezuela, ampiasaina ny katsaka mba hanamboarana arepas, izay manify kokoa noho ny tortillas ary amin'ny karazana sy habe samihafa.  Ity lahatsary manaraka ity dia mpivarotra arepa iray mandehandeha ao  Cali, Kolombia no nampakatra azy, izay nandefa ny toerana afaka ahitàna azy ireo mivarotra ny arepa misy fromazy vokariny tontolo andro, hanina eny an-dalambe miaraka amin'ny dobera ary indraindray miaraka amin'ny ronono:

Chef John, bilaogera momba ny sakafo ao amin'ny  Foodwishes.com dia niezaka ny namolaka ny tànany hanamboatra arepas Venezoeliana izay sesehany hena kisoa amin'ilay karazany nataony ary fantatra amin'ny hoe arepa ‘voloina’ any Venezoela.